आजदेखि मोबाइल डिभाइस म्यानेजमेन्ट सिस्टम लागु, दर्ता नभएका मोबाइल नचल्ने

१ जेठ, काठमाडौं । सरकारले सोमबारदेखि मोबाइल डिभाइस म्यानेजमेन्ट सिस्टम (एमडीएमएस) प्रणाली लागू गरेको छ । मन्त्रिपरिषदको निर्णयअनुसार नेपाल  दूरसञ्चार प्राधिकरणरसञ्चार प्राधिकरणले सोमबारदेखि एमडीएमएस लागु भएको जनाएको छ । मोबाइल फोनको अवैध आयात र बिक्रीवितरण रोक्न भन्दै सरकारले एमडीएमएस लागू गरेको हो । 

प्राधिकरणका अनुसार नेपालमा आयात र प्रयोग गरिने मोबाइल सेट एमडीएमएस प्रणालीमा दर्ता नगरे ती अवैध हुनेछन् भने फोन समेत चल्ने छैन् । यसमा दर्ता नभएकालाई मोबाइल नेटवर्क सेवा प्राप्त हुँदैन । यसअघि प्रधानमन्त्रीकै निर्देशनमा एमडीएमएस प्रणालीको कार्यान्वयन रोकिएको थियो ।  बैशाख २६ गतेको मन्त्रिपरिषद् बैठकले पुनः यो प्रणाली लागु गर्ने निर्णय गरेको थियो । 

प्राधिकरणले यसअघि ०७८ साउन र ०७९ भदौमा पनि एमडीएमएस प्रणाली आंशिक रूपमा लागू गरेको थियो । ०७९ पुस १५ बाट भने पूर्ण रूपमा प्रणाली लागू गर्ने भनिएको थियो । तर वैदेशिक रोजगारीबाट फर्किएका नेपाली श्रमिकले ल्याएका मोबाइल फोनको पनि कर र भन्सार शुल्क तिर्नैपर्ने विषय विवादमा आएपछि यो रोकिएको थियो । दुई वटा मोबाइल सेट ल्याउन नपाउने कुराको आलोचना भएपछि प्रधानमन्त्री पुष्पकमल दाहालले तत्काल प्रणाली लागू नगर्न निर्देशन दिएका थिए ।

प्राधिकरणले जारी गरेको सूचनाअनुसार व्यक्तिगत प्रयोजनका लागि विदेशबाट ल्याई भन्सार कार्यालयमा जाँचपास भएका मोबाइल सेट एमडीएमएस प्रणालीमा स्वतः दर्ता हुने नियम बनाइएको छ । यता, भन्सार विभागले भने दुई वटा फोनमा भन्सार शुल्क नलाग्ने सुविधा विदेशबाट फर्किने जोकसैका लागि नभएको बताएको छ । विभागले सार्वजनिक गरेको सूचनाअनुसार श्रम स्वीकृति लिएर वैदेशिक रोजगारीमा गई कम्तीमा ६ महिना लगातार काम गरेर फर्किएका नेपाली नागरिकले मात्रै दुई थान मोबाइल फोन ल्याउँदा पाउने छन् । 

प्राधिकरणका अनुसार हालसम्म २७ हजार थान मोबाइल एमडीएमएस प्रणालीमा दर्ता भएका छन् । ४० लाख मोबाइल सेटको आईएमईआई नम्बर दर्ता नभएको अनुमान गरिएको छ ।  प्रणालीमा दर्ता भएका आईएमईआई नम्बरका आधारमा बनाइएका ह्वाइट, ग्रे र ब्ल्याक लिस्टमध्ये ७९ हजार आईएमईआई ग्रे लिस्टमा रहेको प्राधिकरणको भनाइ छ ।