रेशम चौधरी लगायत १० जनाको मुद्दामा सर्वोच्चमा सुनुवाइ जारी

१ जेठ, काठमाडौं । रेशम चौधरीलगायत दर्जन जनासँग जोडिएका टीकापुर घटनाको मुद्दामा सर्वोच्च अदालतमा सोमबार सुनुवाइ सुरु भएको छ । 
कर्तव्य ज्यान, डाँका चोरी तथा ज्यान मार्ने उद्योग मुद्दामा न्यायाधीश आनन्दमोहन भट्टराई र नहकुल सुवेदीको संयुक्त इजलासमा सुनुवाइ भइरहेकाे छ । 

यो मुद्दामा जिल्ला अदालत कैलाली र उच्च अदालतले भने उनीहरूलाई दोषी ठहर गरेर जेल थुनामा पठाएपछि उनीहरूले सर्वोच्चमा पुनरावेदन गरेका थिए । सुनुवाइ सकिएमा आजै फैसला आउने अनुमान गरिएको छ । पुनरावेदन छुट्टाछुट्टै दर्ता भएपनि एकै इजलासमा सुनुवाइ सुरु भएको हो ।

यता सरकारले टिकापुर घटनाका दोषीलाई रिहाईमा सहयोग पुग्ने गरी सरकारले विधेयक संसद्‌मा दर्ता गराएको छ । सर्वोच्चले पनि उनीहरूलाई दोषी ठहर गरेमा भने विधेयक निकम्मा सावित हुनेछ । टिकापुर घटनामा दोषी ठहर भएका रेशमसहित १२ जनाको पुनरावेदन रिटमा सुनुवाइ सुरु भएको हो ।

जेलमा रहेका रेशमकै योजनामा गत १५ महिना पहिले गठन भएको नागरिक उन्मुक्ति पार्टीले वैशाखको स्थानीय तह र मंसिरको आम निर्वाचनमा राम्रै सफलता हासिल गरेको छ । अहिले उनकी श्रीमती रञ्जिता श्रेष्ठ प्रचण्ड नेतृत्वको सरकारमा भूमि व्यवस्था मन्त्री छिन् ।

नाउपाले टिकापुर घटनामा मुछिएर जेलमा रहेका सबै कैदीको मुद्दा खारेजी र रिहाइलाई सरकारको समर्थन र सरकारमा सहभागी हुने विषयलाई मुख्य माग बनाउँदै आइरहेको छ । माग सुनुवाइ गर्ने आश्वासनपछि नै श्रेष्ठ मन्त्री बनेकी थिइन् । 

वर्तमान संधिवान जारी हुनु करिब महिना दिनपहिले संविधानप्रति असहमति जनाउँदै २०७२ साउन ७ गते थरुहट राज्यको माग गर्दै कैलालीको टीकापुरमा थारू कल्याणकारिणी सभाको नेतृत्वमा भएको आन्दोलनका क्रममा नेपाली प्रहरीका एसएसपी लक्ष्मण न्यौपानेसहित ७ प्रहरी र एक बालकको निर्मम हत्या गरेको आरोपमा रेशमसहित दर्जन थारी नेताहरूलाई जिल्ला अदालत कैलालीले दोषी ठहर गरी जन्मकैद सजाय तोकेको छ ।

उक्त सजाय बदरकाे माग गर्दै रेशमलगायतले दराएका पुनरावेदनलाई उच्च अदालतले खारेज गरी जिल्ला अदालत कैलालीको फैसलालाई सदर गर्ने फैसला सुनाएकाे थियाे । सोही फैसला विरुद्ध उनीहरूले सर्वोच्चमा पुनरावेदन गराएका थिए ।