शरणार्थी प्रकरणका दोषीलाई राज्यविरुद्धको अपराध अन्तर्गत कारवाही गरिनुपर्छः नेपाल

१ जेठ, पर्सा काठमाडौं । नेकपा एकीकृत समाजवाजीका अध्यक्ष माधवकुमार नेपालले नेपालीलाई नक्कली शरणार्थी बनाएर अमेरिका पठाउने भन्दै गरिएको ठगी राज्यविरुद्धको अपराध भएको बताएका छन् । उनले यो ठगी प्रकरणमा सम्लग्न भएका दोषीहरुमाथि पनि राजद्रोह आकर्षित हुने भएकाले उनीहरुलाई यही अन्तर्गत कारवाही हुनुपर्ने बताएका छन् ।  

समाजवादी प्रेस संगठन नेपाल पर्साले सोमबार बिहान वीरगन्जमा आयोजना गरेको पत्रकार सम्मेलनमा अध्यक्ष नेपालले नेपालीलाई नक्कली भुटानी शरणार्थी बनाएर एकै व्यक्तिबाट लाखौ ठगी गर्नु सामान्य विषय नभएको भन्दै यस्तो कार्यमा संलग्नलाई हदैसम्म कानुनी कारबाही हुनु पर्ने पनि बताए ।
नक्कली शरणार्थी प्रकरणको गम्भीरता र यसको आयाम व्यापक भएको उनको भनाइ छ । यसमा धेरै अपराध मिसिएको नेपालले बताए । उनले यो ठगी, कीर्ते, भ्रष्टाचार, मानव तस्करी र अन्तर्राष्ट्रिय संगठित अपराधसमेत भएकाले राजद्रोह अन्तर्गत प्रहरीले मुद्दा चलाउनुपर्ने नेपालको भनाइ छ । 

उनलेभने,‘ यी सबैलाई जोडेर हेर्दा यसको गम्भीरता राजद्रोहमै गएर टुंगिन्छ । यसमा सबै अन्तर्राष्ट्रिय सन्धि तथा अभिसन्धिहरू, मानव अधिकार सम्बन्धी संयुक्त राष्ट्रसंघीय अभिसन्धि लगायत सबैलाई टेकेर टुङ्गोमा पुर्याउनुपर्छ । यो त अन्तर्राष्ट्रिय अपराध नै हो । आफ्नो देशको नागरिकको पहिचान बदलेर विदेश पठाएर पैसा कमाउन प्रलोभन दिनेहरु अपराधी मात्रै होइनन, राष्ट्रद्रोही पनि हुन ।’ नेपालले देशको नै मान, सम्मान र मर्यादामा आँच पुर्याउनेहरुलाई कारबाही गर्न सरकारले खुट्टा कमाउनु नहुने भन्दै उनीहरुलाई हदैसम्म कारबाही गर्नुपर्ने बताए । 

उनले नक्कली भुटानी शरणार्थी प्रकरणमा मुछिएकाहरुलाई पक्राउ गरेर अनुसन्धान प्रक्रिया अघि बढाएकोमा सरकारलाइ धन्यवाद पनि ज्ञापन गरेका छन् ।  ‘यस प्रकरणलाई लिएर वर्तमान सरकारले जुन तरिकाले काम गरिरहेको छ, यो कार्य र साहसिक कदमको सरहाना गर्दछु,’ उनले भने । उनले जनताको विश्वास जित्दै परिणाममुखी कार्य गर्न पनि सुझाव दिएका छन् ।

‘भुटानी शरणार्थी प्रकरणमा मात्र हैन, कुनै पनि भ्रष्टचारजन्य क्रियाकलापमा संलग्नलाई पक्राउ गरी दण्ड र सजाय दिनुपर्छ, यसमा जनता र हाम्रो पार्टीको साथ र समन्वय  र साथ सहयोग रहने नै छ । हामी सरकारको भ्रष्टाचार विरोधी अभियानको साथमा छौं र परेको खण्डमा सहयोग पनि गर्नेछौं, ’उनले भने ।