काठमाडौंमा ‘भ्रष्टाचार’विरुद्ध एमाले पनि सडकमा

१ जेठ, काठमाडौं । प्रमुख प्रतिपक्षी नेकपा (एमाले)ले भ्रष्टाचारविरुद्ध सोमबार काठमाडौंमा प्रदर्शन गरेको छ । काठमाडौंको भृकुटीमण्डपमा एमाले नेता–कार्यकर्ताहरुले प्रदर्शन गरेका हुन् ।

नक्कली भुटानी शरणार्थी प्रकरणमा मुछिएका एमाले नेता टोपबहादुर रायमाझीलाई प्रहरीले पक्राउ गरेको भोलिपल्टै एमालेले भ्रष्टाचारविरुद्ध प्रदर्शन गरेको हो । नक्कली भुटानी शरणार्थी प्रकरणको अनुसन्धान अघि बढाइएकोमा एमालेले असन्तुष्टि जनाउँदै आएको छ । प्रदर्शनकारीहरुले ‘दोषी नछुटुन्, निर्दोष नफसुन्’ लेखिएको ब्यानर र प्लेकार्ड बोकेका छन् । 

प्रदर्शनमा एमाले नेताहरु महेश बस्नेत, ठाकुर गैरे, विशाल भट्टराई, सुजाता शाक्य, अनेरास्ववियु अध्यक्ष समिक बडाल लगायत सहभागी छन् । एमालेको भातृ संगठन युवा संघ र अनेरास्ववियूले प्रदर्शन गरेका छन् ।

यसअघि नेकपा एमालेका अध्यक्ष केपी शर्मा ओलीले रायमाझी खोजीखोजी पक्राउ गर्नुपर्ने व्यक्ति नभएको बताएका थिए । तर रायमाझी १२ दिनदेखि फरार भई लुकेर बसिरहेको अवस्थामा हिजोराति मात्र काठमाडौंबाट पक्राउ परेका छन् ।