संसदमा जिन्स पाइन्ट र टि-शर्ट लगाउन पाउनुपर्ने रास्वपाकी सांसदको माग

१ जेठ, काठमाडौं । राष्ट्रिय स्वतन्त्र पार्टी (रास्वपा)की सांसद सुमना श्रेष्ठले संसद बैठकमा आउँदा टि–शर्ट र जिन्स पाइन्ट लगाउन पाउनुपर्ने माग गरेकी छन् । 

सोमबार बसेको प्रतिनिधिसभाको बैठकमा शून्य समयमा बोल्दै संसदमा भूमिका पहिरनमा नभई चेतना र आचरणमा खोज्नुपर्ने बताइन् । यद्यपि, संसद बैठकमा श्रेष्ठ नै भडकिला पोशाकमा उपस्थित हुने सांसदको रुपमा चिनिन्छन् ।

संसदको बैठकका कार्यसूची तयसम्बन्धी छलफल गर्ने समिति कार्यव्यवस्था बैठकमा संदसमा सहभागी हुन आउँदा सांसदहरुले जातीय वा समूदायकाे मौलिकता, सांस्कृतिक झल्किने र मर्यादित पोशाक मात्र लगाउने निर्णय गरेको थियो । साथै टि-शर्ट र जिन्स पाइन्ट लगाउन प्रतिबन्ध लगाउने निर्णय गरेको थियो । 

सांसद श्रेष्ठले सोही निर्णयप्रति लक्षित गर्दै पोशाक लगाउन पाउने स्वतन्त्र हरेक व्यक्तिलाई रहेको बताउँदै पहिरनमाथि प्रतिबध लगाउने काम गलत रहेको बताइन् । पोशाकमा अंकुश लगाउने प्रणाली जनताले नस्वीकार्ने उनको भनाइ थियो ।