नक्कली भुटानी शरणार्थी छानबिनलाई प्रभावित बनाउन खोजिँदैछ : सांसद पौडेल

१ जेठ, काठमाडौं । नेकपा (माओवादी केन्द्र)का सांसद देवेन्द्र पौडेलले सरकारले गरिहेको नक्कली भुटानी शरणार्थी प्रकरणमा छानबिन प्रक्रियालाई प्रभावित तुल्याउने कोशिस भइरहेको बताएका छन् । 

सोमबार बसेको प्रतिनिधिसभाको बैठकमा विशेष समयमा बोल्दै सांसद पौडेल सदनमा उपस्थित सांसदहरुसँग छानबिनमा सहयोग पुर्याउन आग्रह गरे । उनले छानबिन प्रभावित हुने गरी सांसदहरुले विभिन्न काण्डका कुरा उचालेर सरकारको ध्यान अन्यत्रै मोड्ने कोशिस गरेको उनको भनाइ थियो । प्रकरणमा पक्राउ परेका अभियुक्तहरुमाथि राज्यविरुद्धको अपराधमा मुद्दा चलाउनुपर्ने बताए । 

अर्का सांसद माधव सापकोटाले प्रकरणको निष्पक्ष छानबिन र छिट्टै निष्कर्षमा पुर्याउने गरी सरकारले काम गरिरहेको बेला विपक्षी सांसदहरुले विषयान्तर गराउने कोशिस भएको भन्दै आपत्ति जनाए ।