भ्रष्टाचारविरुद्ध सडक प्रदर्शनले पुग्दैन, संसद आन्दोलन गरौं : ज्ञानेन्द्र शाही

१ जेठ, काठमाडौं । राप्रपाका सांसद ज्ञानेन्द्र शाहीले भ्रष्टाचारविरुद्ध सडक आन्दोलनले मात्र नपुग्ने भन्दै संसद आन्दोलन गर्नुपर्ने बताएका छन् । उनले अहिले सडकमा भइरहेका भ्रष्टाचारविरुद्धको प्रदर्शनमा भ्रष्टाचारको आरोप लागेका आरोपीहरु नै सहभागी भएको बताउँदै चोरी गर्नेहरु नै चोर लखेट्ने कार्यमा संलग्न भएको बताए । 

उनले सडक आन्दोलने मात्र भ्रष्टाचार रोक्ने र भ्रष्टाचारीलाई कारवाही संभव नभएको धारणा राखे । भ्रष्टाचार रोक्न संदसबाट कडा कानुन बनाउन हरेक सांसद पार्टी, सिद्धान्त र विचारबाट माथि उठ्न तयार हुनुपर्ने बताए । 

‘हामी संसदमा रहेका माननीयहरु २०४६ सालपछि भ्रष्टाचार काण्ड छानबिन गर्न र भ्रष्टाचारीलाई कारवाही गर्न कडा कानून बनाउन तयार छौं, छौं भने हात उठाउनुस्’ उनले भने, ‘तयार हुदैनौं भने चोरले नै चोर आयो भन्दै लखेटेसरह अन्य केही हुँदैन ।’

उनले ओम्नी, महरा र गोकुल टेप काण्ड, वाइडबडी, चेज एयर, लाउडा, लडकु शिविर लगायत काण्डमाथि छानबिन गर्न शक्तिशाली आयोग गर्नुपर्ने बताए ।