भ्रष्टाचारको हदम्याद हटाउन माग गर्दै सडक उत्रिएका नेविंघका नेता-कार्यकर्ता गिरफ्तार

१ जेठ, काठमाडौं । सरकारले भ्रष्टाचारका आरोपीलाई कानूनको दायरामा ल्याउन लागेकाे पाँच वर्षे हदम्याद व्यवस्थासहितको विधेयक खारेज गर्नुपर्ने माग राख्दै आन्दोलनमा उत्रिएका नेपाली कांग्रेसका कार्यकर्ताहरुलाई प्रहरीले गिरफ्तार गरेको छ । 

सोमबार काठमाडौंमा आन्दोलनमा उत्रिएका कार्यकर्तालाई प्रहरीले सोमबार नयाँ बानेश्वरस्थित संसद भवन अगाडिबाट गिरफ्तार गरेको हो । प्रहरीले प्रदर्शनमा हस्तक्षेप गरेर नेविसंघका नेताहरु प्रेमिका रानामगर, धर्म शाही, हिक्मत शाही, मन्दिप शाहलाई गिरफ्तार गरेको विद्यार्थी नेता भुवन भट्टले जानकारी दिएका छन् । 

गिरफ्तार परेका विद्यार्थी नेताहरुलाई नयाँ बानेश्वर वृत्त, तीनकुने लगेको छ । गिरफ्तारका क्रममा भएको प्रहरीको बल प्रयोगबाट पक्राउ परेकामध्ये केही सख्त घाइते भएको जनाएका छन् । 

भ्रष्टाचार कसुरमा पाँच वर्षे हदम्यादसम्बन्धी विधेयक आज संसदमा टेवुल भएको छ । विधेयकमा पाँच वर्षभन्दा अगाडिको भ्रष्टाचारमा छानबिन गर्न नमिल्ने कानूनी व्यवस्थाका प्रावधान राखिएको छ ।

प्रदर्शनमा उत्रिएका विद्यार्थीहरु नेताहरुले भ्रष्टाचारको कुनै म्याद नहुने र एकचोटिको भ्रष्टाचारी सधैँभरिको अपराधी हुने तर्क गरेका छन् । विधेयकमा हतम्याद हटाउनुपर्ने उनीहरुको माग छ ।