ठेकेदारले अलपत्र पारेका घोराही–तुलसीपुरको ४ लेन सडकको ठेक्का खारेज

१ जेठ, दाङ । सरकारले घोराही–तुलसीपुरको चार लेन सडकको ठेक्का खारेज गरेको छ । भारतीय निर्माण कम्पनीले ठेक्का लिएर ४ वर्षदेखि अलपत्र पारेको घोराही–तुलसीपुर सडक ठेक्का रद्द गरेको सरकारकी प्रवक्ता समेत रहेकी सञ्चार तथा सूचना प्रविधिमन्त्री रेखा शर्माले सोमबार जानकारी दिएकी छन् । 

सोमबार आफ्नो निर्वाचन क्षेत्र दाङमा पुगेकी मन्त्री शर्माले यो खण्डको ४ लेन सडक निर्माणको सम्झौता भर्खरै खारेज जानकारी दिइन् । उनले ठेक्का खारेजी भएपछि सरकारले सडक मर्मत र निर्माणमा अन्य ठेकेदार ल्याउने बाटो खुलेको पनि बताइन् । ठेक्काको नयाँ प्रक्रिया छिट्टै सुरु हुने पनि जानकारी दिइन् । 

उक्त सडक खण्ड भारतीय एक्जिम बैंकको सहयोगमा बन्न लागेको हो । बनाउने ठेक्का भारतीय निर्माण कम्पनी तथ्य इन्जिनियरिङ एन्ड इन्फ्रा प्रोजेक्टले पाएको थियो । चार वर्षमा बित्दा पनि १० प्रतिशत काम हुन नसकेको र यसबाट स्थानीय धुलोबाट पीडित भएको गुनासो व्यापक बन्दै गएको थियो । 

गाडी गुडदा उड्ने धुलो र रातिको समयमा असुरक्षित सडक कारण धेरै जनाको ज्यान गइसकेको भन्दै स्थानीय र जनप्रतिनिधिहरुले ठेक्का रद्दको माग गर्दै आइरहेका थिए । सडकको काम सडक डिभिजन कार्यालयले वर्षातअघि नै पूरा गर्ने दाबी मन्त्री शर्माले गरिन् ।