पूर्व सभासद आङटावा शेर्पाले जिल्ला प्रहरी परिसर काठमाडौंमा गरे आत्मसमर्पण

१ जेठ, काठमाडौं । पूर्व गृहमन्त्री बालकृष्ण खाँणको पक्षमा बयान गराउन सरकारी वकिल कार्यालय पुगेका पूर्व सभासद आङटावा शेर्पाले प्रहरीमा आत्मसमर्पण गरेका छन् । 

पूर्व गृहमन्त्री खाँणलाई जोगाउन भन्दै सरकारी वकिलको कार्यालयमा पुगेका शेर्पालाई प्रहरीले अनुसन्धानका लागि पक्राउ पूर्जी जारी गरेपछि फरार भएका थिए । उनी फरार भएपछि प्रहरीले खोजतलास गर्दै आएको थियो । त्यसपछि उनले अहिले साँझ जिल्ला प्रहरी परिसर काठमाडौंमा पुगेर आत्मसर्मपण गरेका हुन् ।

भुटानी शरणार्थीको कोटामा अमेरिका पठाउने नाममा ठगेको आरोपमा शेर्पाविरुद्ध पक्राउ पुर्जी जारी भएको छ । रामेछाप स्थायी घर भएका शेर्पा ठेकेदार पनि हुन् । सो प्रकरणमा पक्राउ परेका सानु भण्डारी र केशव दुलाललाई भेटेर खाणको नाम नलिन उनले अनुरोध गरेका थिए । सो विषय बाहिरिएपछि उनीविरुद्ध प्रहरीले पक्राउ पूर्जी जारी गरेको थियो ।