प्रहरीसमक्ष आत्मसर्मपण गर्न पुगेका आङटावा बाथरूममा लडेर घाइते

२ जेठ, काठमाडौं । जिल्ला प्रहरी परिसर काठमाडौंमा आत्मसमपर्ण गर्न पुगेका नक्कली भुटानी शरणार्थी प्रकरणका अभियुक्त पूर्वसांसद आङटावा शेर्पा बाथरुममा लडेर घाइते भएका छन् ।

प्रहरीले पक्राउ पुर्जीसहित तीव्र खोजी गरिरहेको बेला उनले आफैं सोमबार साँझ परिसरमा पुगेर आत्मसमर्पण गरेका थिए । परिसरले उनलाई तत्काल नियन्त्रणमा लिएर हिरासतमा राखेको थियो । राति बाथरुम जाँदा उनी लडेर टाउकोमा सामान्य चोट लागेको परिसर प्रवक्ता एसपी सीताराम रिजालले जानकारी दिए । 

उपचारका लागि उनलाई राति नै वीर अस्पताल लगिएको थियो । अहिले उनलाई परिसरमा सोधपुछ भइरहेको जनाइएको छ । उनलाई थुनामै राख्ने कि तारेख छाड्ने भन्नेबारे आजै निर्णय हुने प्रहरी परिसर स्रोतले जनाएको छ ।

अभियुक्त शेर्पा रामेछापबाट २०७० को संविधान सभामा नेपाली कांग्रेसबाट सभासद बनेका थिए ।