१० विषयगत समितिको बैठकः कुन बैठककाे अध्यक्षता कसले गरे ?

२ जेठ, काठमाडौं । मिनि संसदको रुपमा चिनिने संसदअन्तर्गतका १० वटा विषयत समितिको बैठक सुरु भएको छ । प्रतिनिधि सभा गठन भएको झण्डै ६ महिनापछि  बल्ल आज विषयगत (संसदीय) समितिको बैठक आज सुरु भएको हो ।

समितिको नेतृत्व चयन भइनसकेको कारण समितिका रहेका सदस्यहरुमध्येबाट ज्येष्ठ सदस्यको अध्यक्षतामा सिंहदरबारस्थित संघीय संसद सचिवालयमा आ-आफ्नो कार्यालयमा बैठक सुरु भएको छ । 

सार्वजनिक लेखा समितिको सभापतित्व समितिका ज्येष्ठ सदस्य नेपाली कांग्रेसका सांसद अर्जुननरसिंह केसीले गरेका छन् । पूर्वाधार विकास समितिको सभापतित्व नागरिक उन्मुक्ति पार्टीका सांसद लालवीर चौधरी र अन्तर्राष्ट्रिय सम्बन्ध र पर्यटन समितिको सभापतित्व राष्ट्रिय प्रजातन्त्र पार्टीका सांसद पशुपति समशेर जबराले गरेका छन् ।

यस्तै, उद्योग तथा वाणिज्य र श्रम तथा उपभोक्ता हित समिति सभापतित्व माओवादी केन्द्रका सांसद रणेन्द्र बराइली, कृषि, सहकारी तथा प्राकृतिक स्रोत समितिको सभापतित्व जनता समाजवादी पार्टीका सांसद नवल किशोर साह, शिक्षा तथा स्वास्थ्य समिति सभापतित्व एमालेका सांसद कालुराम राईले सभापतित्व गरेका छन् । राज्य व्यवस्था तथा सुशासन समिति सभापतित्व राष्ट्रिय जनमोर्चाका सांसद चित्रबहादुर केसी छन् ।

यस्तै, महिला तथा सामाजिक मामिला समितिको सभापतित्व राष्ट्रिय प्रजातन्त्र पार्टीकी सांसद रोशन कार्की, अर्थ समितिको सभापतित्व कांग्रेसका सांसद सन्तोष चालिसेले र कानून, न्याय तथा मानव अधिकार समिति बैठकको सभापतित्व नेपाली कांग्रेसका सांसद शेरबहादुर देउवाले गरेका छन् ।