पीडितले फोडे मिटरब्याजीले लगाएको ताल्चा

२ जेठ, काठमाडौं । मिटरब्याजी अर्थात अनुचित लेनदेन गर्ने साहुबाट पीडितहरुले आफ्नो घरमा लगाइएको ताल्चा फोड्न थालेका छन् । मिटरब्याजीबाट तराईमा पनि मुख्य गरी मधेश प्रदेशका पीडितहरुले मिटरब्याजीले ४÷५ वर्षदेखि आफ्नो घरमा लगाएको ताल्चा फोडेर घरभित्र प्रवेश गरेका छन् । ताल्चा फोड्न अधिकांश पीडित महिलाहरु सहभागी छन् । 

सोमबार सर्लाहीको हरिपुरमा मिटरब्याजी सुदखोरले चार वर्ष पहिलेदेखि ताल्चा मारेर कब्जा गरेको घरमा पुगेर ताल्चा फुटाएर उनीहरु प्रवेश गरेका छन् । 

सदरमुकाम मलंगवाका सुदखोर रामस्वरुप रायले हरिपुर नगरपालिका–५ मजुवारकी जमिला खातुनको घर कब्जा गरेर अर्कै व्यक्तिलाई बिक्री गरेको घरमा ताला पीडित र मिटरब्याज पीडित संघर्ष समिति सर्लाहीको पहलमा फोडेर पीडित परिवार घरभित्र प्रवेश गरे । ताल्चा लगाएका कारण जमलिाको परिवार ४ वर्षदखि घरबाहिर बस्दै आएका थिए । 

कब्जा गरेको जमिलाको घर सुदखोर रायले स्थानीय कलिम अन्सारीलाई २० लाख रुपैयाँमा बिक्री गरेको खुलेको छ । रायबाट जमिलाले घरायसी खर्चका लागि ७ वर्ष पहिले दुई लाख रुपैयाँ ऋण लिएकी थिइन् । दुई लाख रुपैयाँ ऋण दिँदा रायले एकलौटी रुपमा ८ लाखको फर्जी कागज बनाएका थिए । 

फर्जी कागजको डर देखाई जमिलाको ४ कोठे पक्की घर र ११ धुर जमिन कब्जा गरेर अर्कै व्यक्तिलाई २० लाख रुपैयाँमा बेचेको पाइएपछि न्याय दिलाउन पहल गरेका ेसंघर्ष समितिकी मधेश प्रदेश संयोजक सरस्वती मिश्रले बताइन् । ताल्चा फुटाउने क्रममा संघर्ष समिति सर्लाही जिल्ला संयोजक रुक्मिणी चौधरी सहभागी थिइन् । 

सरकार के गर्दैछ ? 

पीडितले आफूहरुले लिएभन्दा मिटरब्याजीहरुले लाखौं रुपैयाँ ऋणको कीर्ते र फर्जी कागजका आधारणमा डर, धम्की दिएर परिवारकै उठीबास लगाएको भन्दै मिटरब्याजीमाथि कारवाही गर्न र ऋण चुक्ता भइसकेपछि पनि कब्जा गरेका दृष्टिबन्धक फिर्ताको माग गर्दै तराईका १४ जिल्लाबाट पीडितहरु काठमाडौं आई धर्ना र प्रदर्शन गरेका छन् । 

सोही क्रममा सरकारले पीडितहरुसँग सम्झौता समेत गर्यो । सोही आधारमा सरकारले चर्को ब्याजमा हुने ऋणलाई ‘अनुचित लेनदेन’ (मिटरब्याज)को सूचीमा राखेर मिटरब्याजीलाई फौजदारी अपराधमा कारवाही गर्ने गरी अध्यादेश ल्याइसकेको छ । सोही आधारमा सरकारले मिटरब्याज जाँचबुझ तथा अनुसन्धान आयोग गठन गरेको छ । आयोगको कार्यालय जनकपुधाममा स्थापना गरेर देशैभरका पीडितबाट उजुरी लिइरहेको छ ।