सिन्धुलीमा पशु चौपायामा कार्पस भाइरसको संक्रमण

२ जेठ, सिन्धुली । सिन्धुलीमा पछिल्लो केही दिनयता घरपालुवा पशु चौपायामा कार्पस भाइरसको संक्रमण तीव्ररुपमा फैलिएको छ । यसबाट पशु चौपायाको मृत्युसमेत हुने गरेको छ ।

जिल्लामा नौ स्थानीय तहमध्ये आठवटामा कार्पस भाइरसको संक्रमण फैलिएको छ । कार्पस भाइरसको संक्रणबाट हालसम्म ४२ पशु मरिसकेका छन् । कमलामाई नगरपालिका, दुधौली नगपालिका, तीनपाटन गाउँपालिका, फिक्कल गाउँपालिका, गोलञ्जोर गाउँपालिका, घ्याङलेख गाउँपालिका, मरिण गाउँपालिका र हरिहरपुरगढी गाउँपालिकामा पशुमा कार्पस भाइरसको संक्रमण फैलिएको छ । हालसम्म सुनकोसी गाउँपालिकामा भने कार्पस भाइरसको सङ्क्रमण देखा नपरेको भेटेरिनरी अस्पताल तथा पशुविज्ञ केन्द्र सिन्धुलीका पशु चिकित्सक नवराज थापाले जानकारी दिए । 

सबैभन्दा बढी यस रोगको संक्रमण तीनपाटन गाउँपालिकामा छ । रोगको संक्रमण हुने र मर्नेको सङ्ख्या तीनपाटन गाउँपालिकामा अत्यधिक छ । तीनपाटनमा हालसम्म २३ गाई मरेका छन् । दुई हजार तीन सय ३६ पशु संक्रमित बनेका छन् । विशेषगरी गाईमा यो रोगको सङ्क्रमण बढी देखिएको थापाले जानकारी दिए । रोगका कारण आठ हजार दुई सय ६२ पशु बिरामी भएका छन् ।

कमलामाईमा एक हजार नौ सय ८३ पशु कार्पस भाइरसबाट संक्रमित छन् भने सातवटा मरेका छन् । दुधौलीमा दुई हजार एक सय ४९ पशु संक्रमित छन् । मरिणमा संक्रमित एक हजार ३६ र दुई पशु मरेका छन् । फिक्कलमा एक सय ६० पशुमा संक्रमण छ भने एउटा मरेको थापाले  जानकारी दिए । गोलञ्जोरमा तीन सय ३५ पशुमा संक्रमण र नौवटा पशुको मृत्यु भएको छ ।  हरिहरपुरगढीमा दुई सय १६ पशुमा संक्रमण र एकको मृत्यु भएको छ । यस्तै घ्याङलेखमा ४७ पशुमा संक्रमण देखिएको छ । 

यो रोगका कारण साना बाच्छाबाच्छी र कमजोर खालका गाई बढी मर्ने गरेको थापाले बताए । उनले भने, “रोग प्रतिरक्षा शक्ति कमजोर भएका गाईमा रोगको जोखिम बढी भएको पाइएको छ ।” रोग लाग्न नदिन रोग नलागेका गाईलाई रोगविरुद्धको खोप लगाउन सकिने थापा बताउछन् ।