संसदीय समिति बैठकमा मन्त्री किरातीले भने- ‘यहाँ त मन्त्रीलाई नै डमी बनाउने रहेछ’

२ जेठ, काठमाडौं । संस्कृति, पर्यटन तथा नागरिक उडड्यनमन्त्री सुदन किरातीले संघीय संसद् अन्तरगतको अन्तर्राष्ट्रिय सम्बन्ध र पर्यटन समितिको मंगलबारको बैठकमा सरकार र सरकारका मन्त्रीलाई अरुले नै चलाउने गरेको पाएको धारणा राखेका छन् । 

समिति गठनपछि बसेको पहिलो बैठकमा मन्त्री किरातीले संसद् र सरकार अरूले नै चलाउँदो रहेछ भन्ने अनुभूति आफूलाई भएको धारणा राखेका हुन् । 
मन्त्रीलाई समेत अरुले नै चलाउने भएपछि आफूलाई  ‘डमी’ (शोकेसको मान्छे) जस्तो भएर बस्नु परेको बताए । 
उनले सांसद भन्दा मन्त्री नै बनेपछिको अनुभूति सुनाउँदै भने,  ‘यहाँ त अरूले नै संसद् चलाउँदो रहेछ । अरूले नै मन्त्री चलाउँदो रहेछ । हामी त डमी मात्रै रहेछौं ।’ 

उनले पर्यटनको क्षेत्रमा हामीले धेरै ऐन बदल्नु बाँकी रहेको र सेक्युरिटीसम्बन्धी ऐनलाई सक्रियसाथ छिटो पास गर्नुपर्ने बताए । उनले सांसदहरुले संसद र समितिमा गहिरो चासो दिने र बोल्ने कामले मन्त्रीलाई काम गर्न बल प्राप्त हुने बताए । मन्त्री किरातीले नेपालमा धेरै विमानस्थलहरू आवश्यक नभएको धारणा राखेका थिए ।

हवाइभन्दा सडक यातायातलाई फराकिलो बनाएर कम खर्चिलो र छिटो सेवा दिनुपर्नेमा जोड दिए । सरकार हवाई सुरक्षाका लागि निरन्तर लागिरहेको बताए ।