भ्रष्ट्राचारविरुद्ध स्टाटस् लेखेका युवक ३ दिनदेखि बेपत्ता

२ जेठ, काठमाडौं । भ्रष्ट्राचारका विषयमा सामाजिक सञ्जालमा खरो स्टाटस लेख्दै आएका झापाका एक युवक ३ दिनदेखि बेपत्ता छन् । झापाको बुद्धशान्ति गाउँपालिका– ४ मा ३३ वर्षीय शेरबहादुर सुहाङ्ग बैशाख ३१ गते रातीदेखि बेपत्ता रहेको उनका परिवारले जनाएको छ ।

उनका बुबा खम्बबहादुरले छोराको खोजी गरिदिन इलाका प्रहरी कार्यालय धुलाबारीमा निवेदन दिएका छन् । शेरबहादुर आइतबार बुधबारेमा नेपाल विद्यार्थी संघ र तरुण दलले भ्रष्ट्राचारको विरोधको समर्थन गरेर आफ्नो फेसबुक पेजमा सन्देश लेखेका थिए । 

स्टाटसकै कारण उनलाई आइतबार राति ८–९ जनाको समूहले घरमै आएर हत्याको धम्की दिएको बुझिएको छ । धम्की दिने युवाहरुको पहिचान भइसकेको बताएका छन् । धम्कीपछि साथी कुलबहादुर गौतमसँग घरबाट निस्केका उनी बेपत्ता रहेको उनका बाबुले बताएका छन् । निवेदनका आधारमा खोजी कार्य जारी रहेको प्रहरीले जनाएको छ ।