नक्कली शरणार्थी प्रकरण अनुसन्धानबारे सरकारको जवाफ चाहियो : महामन्त्री शर्मा

२ जेठ, काठमाडौं । नेपाली कांग्रेसका महामन्त्री एवं सांसद विश्वप्रकाश शर्माले नक्कली भुटानी शरणार्थी प्रकरणबारे सरकारको आधिकारिक जवाफ माग गरेका छन् । मंगलबार राज्य व्यवस्था तथा सुशासन समितिको बैठकमा बोल्दै सांसद र्माले अनुसन्धान कहाँ पुग्यो, के भइरहेको छ भन्नेबारे सरकारले आधिकारिक जवाफ तत्काल दिनुपर्ने बताए ।

उनले सरकारले नक्कली भुटानी शरणार्थीमा छानबिनका लागि सबै दलको समर्थन पाएको भन्दै दोषी नउम्किने र निर्दोष नफस्ने गरी कारबाही अघि बढाउनुपर्ने बताए । उनले भने,  ‘नक्कली भुटानी शरणार्थी प्रकरणबारे हामी सुसूचित हुन जरुरी छ । दोषीहरु कोही नछुटुन्, निर्दोष कोही नफसुन् भनेर सबै राजनीतिक दलहरुले भनिरहेकै छन् । अनुसन्धानको प्रगतिबारे गृहमन्त्रीज्यूको भनाइ हामीले सुन्न पाएका छैनौं । सक्कली छानबिनको वस्तुस्थिति के छ भन्नेबारे जानकारी गराउन आवश्यक छ ।’

शर्मा, अर्का महामन्त्री गगन थापा, सहमहामन्त्री भीष्म आङदेम्बेले गृहमन्त्री नारायणकाजी श्रेष्ठसँग भेट गरी प्रकरणमा निष्पक्ष छानबिन गरी दोषी कसैलाई कारवाहीबाट छुट नदिन यसअघि नै ध्यानाकर्षण गराएका थिए । 

प्रकरणमा नेपाली कांग्रेसका नेता एर्व पूर्वगृहमन्त्री बालकृष्ण खाण, एमाले सांसद एवं पूर्वउपधानमन्त्री टोपबहादुर रायमाझी, तत्कालीन गृहसचिव टेकनारायण पाण्डे लगायत १२ जना पक्राउ परिसकेका छन् । उनीहरुविरुद्ध संगठित अपराध र ठगी कसुरमा अनुसन्धान भइरहेको प्रहरीले जनाउँदै आइरहेको छ । प्रकरणमा कांग्रेस सभापति एवं पूर्वप्रधानमन्त्री शेरबहादुर देउवाकी पत्नी आरजु राणा र पक्राउ परेका खाणकी पत्नी मञ्जु खाणको नाम समेत जोडिएको छ । मञ्जु भने सम्पर्कविहीन छिन ।

प्रकरण सार्वमौभ नेपाली नागरिकलाई नक्कली भुटानी शरणार्थी बनाएर विदेशमा पठाउने काम राज्यविरुद्धको अपराध भएको भन्दै अभियुक्तहरुलाई राष्ट्रद्रोहको मुद्दा चलाउनुपर्ने मागसहित संसदमा संकल्प प्रस्ताव दर्ता गरिसकेको छ ।