रेशम चौधरीलाई थुनामै राख्ने सर्वोच्चकाे फैसला, अन्य २ जनालाई सफाई

२ जेठ, काठमाडौं । जेलमा जन्म कैदको सजाय भुक्तान गरिरहेका नागरिक उन्मुक्ति पार्टी (नाउपा) का संरक्षक एवं पहिचानवादी नेता कैलालीका रेशमलाल चौधरीको मुद्दामा सर्वोच्च अदालतले सफाई दिन अस्वीकार गरेको छ । 

कैलालीको टीकापुरमा २०७२ साल साउन ७ मा नेपाल प्रहरीका उच्च अधिकारीसहित ७ प्रहरी र एक नाबालकको हत्या भएको घटनामा चौधरीलाई मुख्य योजनाकार र अन्य दर्जन बढीलाई जिल्ला अदालत कैलाली र उच्च अदालत दिपायलले दोषी ठहर्याइ जेल सजाय तोकेको फैसलालाई सर्वोच्चले पनि सदर गरेको हाे । 

सोमबार र मंगलबार २ दिन सर्वोच्च अदालतका न्यायाधीश द्वय डा आनन्दमोहन भट्टराई र नहकुल सुवेदीको संयुक्त इजलासमा उनको मुद्दामा सुनुवाइ भएको हो । सुनुवाईपछि चौधरीलाई उच्च अदालतले गरेको जन्मकैदको फैसला सदर गर्ने निर्णय गरेको छ । 

टिकापुर घटनामा मुछिएका सीताराम चौधरी र गंगाराम चौधरीलाई भने सर्वोच्चले सफाइ दिएको छ । प्रतिवादी लक्ष्मण थारुको हकमा ५ वर्षको कैद सजाय घटाएर ३ वर्ष झारिएको छ । इजलासले संक्षिप्त आदेश जारी गर्दै यस्तो फैसला सुनाइएको हो ।

घटनामा दोषी ठहर भएका रेशम लगायत १४ जनाले २०७७ कार्तिक १२ र अन्य फरक फरक मितिमा जिल्ला र उच्च अदालतको फैसला बदरको माग गर्दै सर्वोच्चमा पुनरावेदन दिएका थिए ।