विभिन्न स्थानमा भ्रष्टाचारविरुद्ध विरोध प्रदर्शन

२ जेठ, काठमाडौं । देशका विभिन्न जिल्लामा भ्रष्टाचारविरुद्ध राजनीतिक दल र स्थानीयले विरोध प्रदर्शन गरेका छन् । क्रान्तिकारी कम्युनिस्ट पार्टी, नेपाल र नेकपा मशालले चितवनको भरतपुर र दाङको घोराहीमा मंगलबार संयुक्त रुपमा प्रदर्शन गरेका छन् । 

नेपालीलाई भुटानी नागरिक बनाइ अमेरिका पठाउन गरिएको घटना र मौलाउँदै गइरहेको भ्रष्टाचारविरद्ध विरोध प्रदर्शन गरेका हुन् । प्रदर्शनकारीहरुले नक्कली शरणार्थी बनाएर सर्वसाधारणबाट करोडौं रुपैयाँ ठगी गर्ने र राज्यको ढिकुटी लुटेर अकुत सम्पत्ति थुपार्ने भ्रष्टाचारीलाई कडा कारवाहीको माग गरेका छन् । 

विरोध जुलसपछि घोराहीमा आयोजना गरिएको विरोध सभामा बोल्दै नेकपा मशालका दाङ सचिव रामबहादुर जिएमले नक्कली शरणार्थी प्रकरणका सबैलाई कानुनी कारवाहीको दायरामा ल्याउन सरकारसँग माग गरे । उनीहरुले भ्रष्टाचारको आरोप लागेका व्यक्तिको तस्बीर अंकित ब्यानर र भ्रष्टाचारविरोधी कार्टुन प्रदर्शन गरेका थिए ।

यस्तै क्रान्तिकारी कम्युनिस्ट पार्टीका केन्द्रीय सदस्य समीर केसीले नक्कली शरणार्थी बनाउने योजनामा सामेललाई राजद्रोहको मुद्दा चलाउन र भ्रष्टाचारीको सम्पत्ति जफत गर्नेपर्ने धारणा राखे । 

नक्कली शरणार्थी प्रकरणलाई निष्पक्ष छानबिन गर्न र दोषीलाई कारवाहीको माग गर्दै नेविसंघ, तरुण दल, अनेरास्वयिवयु्, वाइसीएल लगायतले प्रदर्शनलाई निरन्तरता दिँदै आएका छन् ।

यस्तै, नेकपा (एकीकृत समाजवादी), रास्वपा, राप्रपा लागयत राजनीतिक दलहरुले पनि शक्ति र सत्ताको दबाबमा प्रकरणमाथिको छानबिन प्रभावित हुन नदिने खबरदारी गर्दै आइरहेका छन् । तिन दलहरु र तिनका भातृ संगठनहरुले प्रधानमन्त्री प्रचण्ड र गृहमन्त्रीलाई नारायणकाजी श्रेष्ठलाई भेटेर ज्ञापनपत्र समेत बुझाइसकेका छन् ।