एमालेभन्दा विरोधीहरु बलिया भएकाले मदन भण्डारीको सपना साकार बनाउन सकिएनः अध्यक्ष ओली

३ जेठ, काठमाडौं । नेकपा एमालेका अध्यक्ष केपी शर्मा ओलीले विरोधीहरु बलिया भएका कारण मदन भण्डारीको समृद्ध नेपाल सुखी नेपालीको सपना अधुरै रहेको बताएका छन् । दिवंगत मदन भण्डारी र जीवराज आश्रितको स्मृति दिवसका अवसरमा बुधबार बल्खुमा आयोजित कार्यक्रममा उनले सबैले आफ्ना सपना पूरा गर्न नसक्ने भन्दै उत्तराधिकारीले त्यसलाई पूरा गर्नुपर्ने बताए ।

उनले भने,‘मदन भण्डारीले आफ्नो इच्छा पूरा गर्न भ्याउनु भएन । आफ्ना अधुरा महान् सपना बोकेर तीनलाई पूरा गर्न नभ्याउँदै हत्या गरिएका कमरेड मदन भण्डारी र जीवराज आश्रित । उहाँहरू वास्तवमै आदर्श हुनुहुन्छ । नयाँ नेपाल, समृद्ध नेपाल सुखी नेपाली बनाउने मदन भण्डारीको सपना अधुरै छ । त्यो आज उत्ताराधिकारी तपाईं हामीले त्यसलाई पूरा गर्नुपर्ने छ । पूरा गर्न सजिलो छैन । चुनौती छ । विरोधीहरू बलिया छन् । षड्यन्त्रपूर्ण ढंगले अघि आउँछन् ।’

चुनौतीको सामना गदै सपना साकार गर्न सकिने पनि उनले बताए । उनले पार्टीको नीति सही भए पनि संगठन सुदृढीकरणको आवश्यकता औँल्याए । अध्यक्ष ओलीले मदन भण्डारीको हत्याबारे समयक्रममा सत्यतथ्य बाहिर आउने बताए । उनले भने, ‘मैले भनिराख्नु पर्दैन, कहाँ कसरी उहाँहरूको हत्या भएको थियो । त्यस सन्दर्भमा उमेश गिरीले एउटा अन्तवार्ता दिनुभएको छ, केही अगाडि । उहाँले मदन भण्डारीको हत्या गर्ने कामको जिम्मा मलाई दिन खोजिएको थियो, मैले मानिनँ भनेर खुलस्त पार्नुभएको थियो । नाम तोकेर भन्नुभएको छ, फलानाले बोलाएर मलाई यसो भनेका थिए भनेर । यस सन्दर्भमा समयमा खोजी हुनेछ । सत्यतथ्य बाहिर आउनेछन् ।’

उनले देश बनाउने संकल्प बोकेर हिँडेका नेताहरू गुमाएको दिनका रूपमा यस दिनलाई स्मरण गरे । ओलीले भण्डारीको ‘समृद्ध नेपाल सुखी नेपाली’को सपना अधुरै रहेको पनि बताए । ओलीले अहिले पनि विरोधीहरुले एमालेलाई ठाउँ ठाउँमा रोक्न खोजिरहेकको बताए । विरोधिहरु बलिया भएकाले एमालेले अघि सारेका कामहरुले पूर्णता पाउन नसकेको उनले बताए ।