राजनीतिक संरक्षणकै कारण भ्रष्टाचार बढेको हो : माधव नेपाल

३ जेठ, काठमाडौं । सरकारका घटक नेकपा (एकीकृत समाजवादी)का अध्यक्ष माधवकुमार नेपालले राजनीतिक संरक्षणकै कारण मुलुकमा भ्रष्टाचार व्याप्त बनेको बताएका छन् । उनले राजनीतिक रुपमै भ्रष्टाचारलाई निर्मुल पार्नुपर्ने बताएका छन् । 

मदन–आश्रितको ३०औँ स्मृति दिवसका अवसरमा पार्टीद्वारा आज काठमाडौंमा आयोजित श्रद्धाञ्जली सभामा धारणा राख्दै पूर्वप्रधानमन्त्री समेत रहेका नेपालले राजनीतिक संरक्षणमा बढ्दै गइरहेको भ्रष्टाचारले देश विकासमा अवरोध पुर्‍याएको बताए ।

उनले विश्वभर रक्षात्मक रहेको कम्युनिष्ट आन्दोलन तत्कालीन समयमा अग्रज नेता मदन भण्डारीले प्रतिपादन गरेको जनताको बहुदलीय जनवाद (जबज)ले नेपाली क्रान्तिको मौलिक सिद्धान्तलाई स्थापित गरी अन्तर्राष्ट्रिय तहमा कम्युनिष्ट विचार तथा आन्दोलनलाई उचाइमा पुर्‍याएको धारणा राखे । जीवराज आश्रितले पार्टीको विधि विधान, सिद्धान्त, नीति र आदर्शअनरुप सङ्गठन निर्माणमा योगदान गरेको र कुशल सङ्गठक रहेको बताए । 

सोही कार्यक्रममा नेता एवम पूर्वप्रधानमन्त्री झलनाथ खनालले कम्युनिष्ट आदर्शका वैचारिक योद्धाका रूपमा मदन–आश्रितका योगदानलाई स्मरण गर्नुपर्ने बताए । मदन र आश्रितको निधनले लोकतान्त्रिक आन्दोललाई ठूलो क्षति पुगेको बताए । उनले नेपालका कम्युनिष्टमा मात्र नभई नेपाली राजनीतिमै अहिले कालो बादल माडिरिरहेको बताउँदै यसलाई हटाउन सबै दल विकास र समृद्धिको एउटै एजेण्डामा एकतावद्ध हुनुपर्नेमा जोड दिए । दास दुंगा हत्याकाण्डमाथि अनुसन्धान अझै पूरा नभएको र कालान्तरमा दोषीलाई जनताले बाहिर ल्याएरै छाड्ने विश्वास उनले व्यक्त गरे ।

२०५१ साख जेठ ३ गते एमालेका तत्काली महासचिव मदन भण्डारी र संगठन प्रमुख जीवराज आश्रितको पोखराबाट चितवन जाँदै अमर लामाले चलाएको गाडी चितवनको दासढुंगास्थित नारायणी नदीमा खसेको थियो । सो दुर्घटनामा मदन र आश्रितको निधन भएको थियो । सो दुर्घटनालाई एमालेले हत्याको संज्ञा दिँदै दोषी पत्ता लगाउनुपर्ने भन्दै आइरहेको छ । चालक लामा भने सकुशल बाँचेका थिए । पछि माओवादीले संचालन गरेको १० वर्षे सशस्त्र द्वन्द्वकालमा काठमाडौंको डल्लीबजारबाट एक पत्रिकाको कार्यालयबाट अपहरण गरी लगेकामा भोलिपल्ट मृत फेला परेका थिए ।