एमसीसी पास भएपछि नेपालमा अमेरिकी सेनाको उपस्थिति बढ्यो : झलनाथ खनाल

३ जेठ, काठमाडौं । पूर्वप्रधानमन्त्री एवं नेकपा (एकीकृत समाजवादी)का नेता झलनाथ खनालले एमसीसी परियोजना संसदबाट पास भएपछि नेपालमा अमेरिकी सरकारका प्रतिनिधि र सेनाको उपस्थिति बढेको बताएका छन् । उपस्थिति बढेसँगै मुलुकको स्वाधीनतामाथि आँच पुग्ने गतिविधिमा वृद्धि भएको भन्दै आपत्ति जनाएका छन् । 

काठमाडौंमा बुधवार ३१औं मदन–आश्रित स्मृति दिवसको कार्यक्रमलाई सम्बोधन गर्दै नेता खनालले नेपालको संसदले एमसीसी र एसपीपी पास गराएपछि अमेरिकी सेनाका र सरकारका एकपछि अर्को समूह नेपाल आउने क्रमम तीव्र बनेको बताए । उनले नेपाललाई अमेरिकाले खेल मैदान बनाउन खोजेको भन्दै यसलाई विफल तुल्याउनुको विकल्प नरहेको बताए । 

‘अमेरिकाका रक्षामन्त्रीहरु आएर सबैभन्दा पहिले तिब्बतीय क्याम्पमा र नेपालका गृहमन्त्रीसम्म पगेका छन्’ उनले भने, ‘शक्ति राष्ट्रको घमण्डमा उनीहरुले नेपाललाई खेलमैदान बनाउने क्रमलाई बढाउँदै लगेका छन् ।’

उनले विदेशीको गोटीचाल बेलैमा बुझेर रोक्नुपर्ने बताए । ‘मिलेनियम च्यालेन्ज कर्पोरेसन (एमसीसी) र स्टेट पार्टनरशिप प्रोग्राम ९एसपीपी० पास गरेसँगै नेपालमा अमेरिकी सेना र सरकारका प्रतिनिधिहरुको उपस्थिति बाक्लिन थालेको छ’ उनले भने, ‘हामी चुप बस्न हुदैन । राष्ट्रियता र स्वाधीनताको विषयमा सबै दल र जनता एक ठाउँमा उभिएर सामना गर्नुपर्छ ।’

अर्को फरक प्रसंगमा नेता खनालले नक्कली भूटानी शरणार्थी प्रकरण लज्जास्पद र राष्ट्रघाती भएको तर्क गरेका छन् । उनले यो प्रकरणको निष्पक्षरुपमा छानबिन गरी टुंगोमा पुर्‍याउइ सबै दोषीलाई कडा कारवाही गर्न सरकारको ध्यानाकर्षण गराए । शरणार्थीजस्तो विषयमा मुलुककै गृह प्रशासन मुछिएको देखेर विदेशी शक्तिले देशलाई हेप्ने र हस्तक्षेप बढाउने खतरा रहने उनको भनाइ थियो ।