समानुपातिक निर्वाचन प्रणाली हटाएर कांग्रेस एक्लै चुनावमा जानुपर्छः कोइराला

३ जेठ, काठमाडौं । नेपाली कांग्रेसका नेता डा. शेखर कोइरालाले राजनीति स्थायित्वका लागि समानुपातिक निर्वाचन प्रणाली हटाउनुपर्ने बताएका छन् । उनले अहिलेको निर्वाचन प्रणालीमा सुधार गर्न आवस्यक रहेको बताएका छन् । अहिले भएको निर्वाचन प्रणालीले देशमा विकृति बढाएको र राजनीति अस्थिरता बढाउन सघाउ पुर्याएको उनको भनाइ छ ।

बुधबार प्रजातान्त्रिक बिचार समाजको २५ औं साधारण सभालाई काठमाडौंमा सम्बोधन गर्दै नेता कोइरालाले अबका दिनमा हुने जुनसुकै निर्वाचन कांग्रेस एक्लै लड्नुपर्ने बताए । विचार मिल्ने र नमिल्ले दलसँग सहकार्य गर्दा निर्वाचन कांग्रेसलाई घाटा भइएको बताए । गएको निर्वाचनमा नेकपा माओवादी र एकीकृत समाजवादी लगायतका दलसँग चुनावी गठबन्धन गर्दा कांग्रेसले क्षति व्यहोर्नु परेको कोइरालाले बताए । 

अहिलेको निर्वाचन पद्धतिले विकृति बढाएको भन्दै कोइरालाले यसलाई परिवर्तन गरेर समानुपातिक प्रणालीलाई हटाउनुपर्नेमा जोड दिए । समानुपातिक पद्धती हटाएर सबैलाई प्रतिस्पर्धाका लागि योग्य बनाउने पने कोइरालाको भनाइ छ । समानुपातिक प्रणालीबाट प्रभावशाली नेताले आफुन्तलाई प्राथमिकता दिँदा त्यसले पार्टीमा असन्तुष्टि बढाएको कोइरालाले बताए । 

पछिल्ला दिनहरुमा राजनीतिक दल र नेताहरुप्रति सर्वसाधारणको धारणा नकारात्मक रहेकाले नेताहरु सुध्रिनुपर्ने बताएका छन् । कोइरालाले नक्कली भुटानी शरणार्थी प्रकरणका दोषीहरुलाई कुनै बहानामा चोख्याउने काम हुन नहुने पनि बताए । ‘जुनसुकै दल वा जुन तहका ब्यक्ति भए पनि कानुन बमोजिम कारबाही हुनैपर्छ’ उनले भने ।