सर्वोच्चको फैसलापछि रेशम चौधरीले भने- ‘पुनरावलोकनको बाटो खुला छ, न्यायिक पर्खाइमा छु’

३ जेठ, काठमाडौं । नागरिक उन्मुक्ति पार्टी (नाउपा)का संरक्षक तथा टीकापुर घटनाका मुख्य आरोपी रेशम चौधरीले मंगलबार सर्वोच्च अदालतले उनलाई जन्मकैद सजायको फैसालाई स्वीकार गर्ने बताएका छन् । फैसलाको भोलिपल्ट बुधबार एक पत्रमार्फत धारणा सार्वजनिक गर्दै सर्वोच्च अदालतको फैसलाले आफूलाई न्याय नदिएपनि स्वीकार्नुको विकल्प नभएको बताएका छन् । 

उनले फैसलालाई लिएर सामाजिक संजालहरुमा अनर्गल सामाग्री पोष्ट गरिएको भन्दै त्यसप्रति आफ्नो ध्यानाकर्षण भएको जनाउँदै त्यसो नगर्न अनुरोध गरेका छन् ।  उनले आफू लगायत २०७२ भदौ ७ मा भएको टिकापुर घटनामा जिल्ला अदालत कैलाली र उच्च अदालत दीपायलले सुनाएको जन्मकैद फैसला बदर गर्न माग गर्दै दायर गराएका पुनवरावेदनमाथि सोमबार र मंगलबार सुनुवाइ गर्दै सर्वोच्चले मंगलबार नै जिल्ला र उच्चको फैसलालाई सदर गर्ने फैसला सुनाएको थियो । 

‘मिति २०८० ज्येष्ठ २ गते सम्माननीय सर्वोच्च सर्वोच्च अदालतले गरेको फैसलामा म प्रति न्यायिक नहुन सक्छ, तर त्यसो भन्दैमा स्वीकार्नुको विकल्प हुन्न,’ विज्ञप्तिमा भनिएकाे छ ।

उनले सर्वोच्चको फैसलाको पुनरावलोकनका लागि निवेदन दिने संकेत दिएका छन् ।  ‘हामी अझै न्यायिक पर्खाइमा छौं । त्यसैले सबैलाई सम्मानित सर्वोच्च अदालतको सम्मान गर्न अनुरोध गर्दै यो विज्ञप्ति जारी गरेको छु, उनले भनेका छन्, ‘म डिल्लीबजार कारागारमा धैर्य, सहनशीलताका साथ कैद भुक्तान गरिरहेको छु । स्वस्थ छु । रत्तिभर मन विचलित छैन ।’