समितिको बैठकमा देउवा नगएपछि मंगलप्रसाद बने सभापति

४ जेठ, काठमाडौं । समितिको सभापतित्व गर्नुपर्ने बैठकमा कांग्रेस सभापति एवं सांसद शेरबहादुर देउवा नगएपछि कानुन न्याय तथा मानवअधिकार समितिको बैठकमा ज्येष्ठ सदस्य खोज्न केही बेर समय लागेको छ । शेरबहादुर देउवा अनुपस्थित भएपछि ज्येष्ठ सदस्य मंगलप्रसाद गुप्ताको सभापतित्वमा बैठक सुरु भएको छ । 

गुप्ता नेकपा एमालेका सांसद हुन् । समितिको आन्तरिक कार्यविधि र संक्रमणकालीन न्यायसम्बन्धी विधेयक अगाडि बढाउने विषयमा छलफल गर्न बैठक बोलाइएको थियो । जेठ २ गते देउवाले नै ज्येष्ठ सदस्यको हैसियतमा समितिको सभापतित्व गरेका थिए । सोही समितिको बैठकले आजका लागि बैठक बोलाएको थियो । 

बैठक अहिले सुचारु भएको छ । दलहरुले नाम नदिएका कारण प्रतिनिधिसभा अन्तर्गतका विषयगत समितिहरुको सभापति चयन हुने सकेको छैन । सभापति चयन नहँदा बजेट लगायतका विषयमा समितिले छलफल गर्न सकेका छैनन् ।