२० सांसदले टिपाए प्रश्न, १५ को मात्र उत्तर दिइने

४ जेष्ठ, काठमाडौं । बिहीबारको प्रतिनिधिसभा बैठकमा प्रधानमन्त्री पुष्पकमल दाहाल प्रचण्डसँग सवाल जवाफ गर्न २० जना सांसदले प्रश्न टिपाएका छन् । २० सांसदले २० प्रश्न संसद सचिवालयमा टिपाए पनि प्रधानमन्त्री प्रचण्डले भने १५ जना सांसदको मात्र प्रश्नका उत्तर दिने भएका छन् । पाँच जना सांसदले प्रश्नको उत्तर पाउने छैनन् ।  

प्रधानमन्त्री प्रचण्डले प्रतिनिधिसभामा बिहीबार सांसदहरूका १५ प्रश्नको मात्र सामना गर्नेछन् । जसमा पूर्वमाओवादी लडाकुको खर्च, वाइडबडी विमान, ललिता निवासदेखि भुटानी शरणार्थी प्रकरणसम्मका विषयमा सांसदहरूले प्रधानमन्त्रीसँग प्रश्न राख्दैछन् । प्रतिनिधिसभा नियमावलीको नियम ५६ (५) मा एक दिनको बैठकमा बढीमा १५ जनाले मात्र प्रश्न गर्न मिल्ने व्यवस्था छ । 

त्यहीअनुसार १५ सांसदले मात्र बिहीबार प्रचण्डसँग प्रश्न गर्ने मौका पाउनेछन् । संसद् सचिवालयले सांसदबाट प्राप्त प्रश्न तयारीका लागि मंगलबार नै प्रधानमन्त्री कार्यालयमा पठाइसकेको छ । संसद् सचिवालयका अनुसार कांग्रेस र एमालेबाट ३÷३ जनाले प्रश्न गर्न पाउनेछन् । 

माओवादी, राष्ट्रिय स्वतन्त्र पार्टी, राप्रपा, जनता समाजवादी, एकीकृत समाजवादी, जनमत, लोकतान्त्रिक समाजवादी, नागरिक उन्मुक्ति पार्टीका १÷१ जनाले प्रश्न गर्नेछन् । एक सांसद रहेका राष्ट्रिय जनमोर्चा, नेमकिपा, आम जनता पार्टी र दुई स्वतन्त्र सांसदमध्येबाट १ जनाले बोल्नुपर्ने सचिवालयले जनाएको छ ।