प्रधानमन्त्री प्रचण्ड प्रश्नको ‘कठघरा’मा उभिँदै

४ जेठ, काठमाडौं । प्रनिधिसभाको बैठक बिहीबार बिहान ११ बजे सुरु हुने भनिएपनि अझै सुरु हुन सकेको छैन । बैठकमा प्रधानमन्त्री पुष्पकमल दाहाल ‘प्रचण्ड’ आज सांसदहरुको प्रश्नको कठघरामा उभिँदैछन् । 

प्रतिनिधिसभा नियमावलीको नियम ५६ (५) मा एक दिनको बैठकमा बढीमा १५ जनाले मात्र प्रश्न गर्न सकिने व्यवस्था छ । प्रधानमन्त्री प्रचण्डलाई सोध्न २० सांसदले लिखित प्रश्न मंगलबार नै संसद् सचिवालयमा बुझाइसकेका छन् ।   संसद् सचिवालयले सांसदबाट प्राप्त प्रश्न तयारीका लागि मंगलबार नै प्रधानमन्त्री कार्यालयमा पठाइसकेको छ । प्रश्नकाे सामना गर्दै प्रम प्रचण्डले राेष्ट्रमबाट जवाफ दिनेछन् ।

संसदको दुई ठूला दल कांग्रेस र एमालेबाट ३/३ जनाले प्रश्न गर्न पाउनेछन् । माओवादी केन्द्र, राष्ट्रिय स्वतन्त्र पार्टी, राप्रपा, जनता समाजवादी, एकीकृत समाजवादी, जनमत, लोकतान्त्रिक समाजवादी, नागरिक उन्मुक्ति पार्टीका १/१ जनाले प्रश्न गर्नेछन् । 

संसद सचिवालयका अनुसार १ सांसद रहेका राष्ट्रिय जनमोर्चा, नेमकिपा, आम जनता पार्टी र दुई स्वतन्त्र सांसदमध्येबाट १ जनाले बोल्नुपर्नेछ । कसले बोल्ने भन्ने विषय टुंगो लागिनसकेको सचिवालयको भनाइ छ ।

सांसदहरुको प्रश्न पूर्वमाओवादी लडाकुको खर्च, शान्ति प्रक्रिया, वाइडबडी विमान, ललिता निवास, ओम्नी प्रकरण, लाल आयोगको प्रतिवेदन, उच्च शिक्षा आयोगको प्रतिवेदन, प्रधानमन्त्रीको भारत भ्रमण लगायत विषयमा केन्द्रित छन् । त्यसमध्ये अनुसन्धान चलिरहेको नक्कली भुटानी शरणार्थी प्रकरणलाई मुख्य रुपमा उठाइएको छ ।