देशकै बदनाम गराउने भ्रष्टाचारीले छुट पाउने कुरा कल्पना गर्न सकिँदैन : गृहमन्त्री श्रेष्ठ

४ जेठ, काठमाडौं । उपप्रधान एवम् गृहमन्त्री नारायणकाजी श्रेष्ठले भ्रष्टाचारले देश थिलथिलो बनाएको र यसमा संलग्न कसैलाई पनि सरकारले कारवाही गरेरै छाड्ने प्रतिवद्धता दोहोर्याएका छन् । उनले भ्रष्टाचारीहरुविरुद्ध सरकार निर्ममरुपमा प्रस्तुत हुने बताए । 

बिहीबार बिहान आफ्नै दल माओवादी केन्द्रको प्रवास समन्वय समितिका सहइन्चार्ज लक्ष्मण पन्त नेतृत्वको टोलीलाई भेट दिई अनुसन्धान चलिरहेको नक्कली भुटानी शरणार्थी प्रकरणमा मुछिएका कसैलाई पनि सरकारले नछाड्ने स्पष्ट पारे । अनुसन्धान निष्पक्ष र तीव्र गतिमा भइरहेको समेत उनले जानकारी दिए । शरणार्थी प्रकरणमा दाेषीले छुट पाउने कुरा कल्पनाबाहिरकाे कुरा भएकाे उनकाे भनाइ थियाे ।

‘नक्कली शरणार्थी प्रकरण मात्रै होइन भ्रष्टाचारको जालो देशमा भयानक ढंगले फैलिएको छ । देशलाई थिलथिलो बनाउने र मुलुकलाई नै बद्नाम गराउने भ्रष्टाचारीलाई सरकारले छाड्दैन’, उनले भने । सरकार मुलुकबाट जरोकिलो उखेल्ने अभियानमा लागिपरेको र यसमा सबैले सबै कोणबाट सहयोग गर्नेपर्ने बताए । ठूला योजनाहरू अध्ययन बिना कमिसनको चक्करमा ल्याउने काम भइरहेको भन्ने खबरदारीप्रति सरकार सचेत रहेको त्यसलाई रोक्न नीतिगत रुपमै अघि बडिरहेको बताए ।