राष्ट्रपतिले प्रस्तुत गर्ने नीति तथा कार्यक्रममा निर्धारण गरिएका पोशाक मात्र लगाउन सभामुखको निर्देशन

४ जेठ, काठमाडौं । प्रतिनिधिसभाका सभामुख देवराज घिमिरेले राष्ट्रपतिले सरकारको नीति तथा कार्यक्रम बाचन गर्ने समयमा संसद नियमावलीमा निर्धारण गरिएका पोशाक मात्र लगाएर उपस्थित हुन निर्देशन दिएका छन् । सरकारको नीति तथा कार्यक्रममा सहभागि हुने साँसदलाई ताकिएका मात्र पोशाक लगाएर उपस्थित हुन भनिएको हो । 

आर्थिक वर्ष २०८०÷८१ को नीति तथा कार्यक्रम शुक्रबार प्रस्तुत गर्ने कार्यतालिका छ । राष्ट्रपति रामचन्द्र पौडेलले यही जेठ ५ गते अपराह्न ४ बजे प्रतिनिधिसभा र राष्ट्रियसभाको संयुक्त बैठकमा नीति तथा कार्यक्रम प्रस्तुत गर्ने कार्यक्रम रहेको छ ।   

प्रतिनिधिसभाको आजको बैठकमा सभामुख देवराज घिमिरले सो व्यहोराको पत्र पढेर सुनाउँदै भोलि दिउँसो ३ः४५ बजे सम्पूर्ण सदस्यहरुलाई निर्धारण गरिएका पोसाकमा उपस्थित भएर आसन ग्रहण गरिसक्न निर्देशन दिएका छन् । प्रतिनिधिसभाको अर्को बैठक भने जेठ ५ गते साँझ ६ बजे बस्नेछ ।

प्रतिनिधिसभाको आजको बैठकमा नेपाल सरकारको वार्षिक प्रतिवेदन, २०७८÷७९ पेस भएको छ । बैठकमा प्रधानमन्त्री पुष्पकमल दाहाल ‘प्रचण्ड’ नेपालको संविधानको धारा ५३ एवं सुशासन (व्यवस्थापन तथा सञ्चालन) ऐन, २०६४ को दफा ४१ बमोजिमको ‘नेपाल सरकारको वार्षिक प्रतिवेदन, आव २०७८÷७९’ पेस गरेका हुन् ।