प्रधानमन्त्रीको भारत भ्रमणबारे परराष्ट्रले थाल्यो विज्ञसँग छलफल

५ जेठ, काठमाडौं । परराष्ट्र मन्त्रालयले जेठ तेस्रो साताभित्र हुनसक्ने प्रधानमन्त्री पुष्पकमल दाहाल प्रचण्डको भारत भ्रमणलाई केन्द्रमा राखेर भ्रमणका क्रममा उठाइने विषयहरु तयार गर्न पराष्ट्रका जानकारहरुसँग छलफल सुरु गरेको छ । भ्रमणको मिति तय नभएपनि जेठ तेस्रो साता प्रधानमन्त्रीको भारत भ्रमण हुने कुरामा दुई देशका अधिकारीहरु ढुक्क देखिएका छन् ।  

नेपाल र भारत दुवै देशमा प्रधानमन्त्री प्रचण्डको भ्रमणका विषयमा छलफलहरु भइरहेका छन । सचिव स्तरीय छलफलले पनि प्रधानमन्त्री भ्रमणका केहि एजेण्डहरु तयार गरेको छ । परराष्ट मन्त्रालयका कर्मचारीका अनुसार प्रधानमन्त्रीको भारत भ्रमण जेठ १८ देखि २० भित्रमा हुने छ । यसैलाई मध्य नजर राख्दै परराष्टमन्त्री एनपी साउदले आज शुक्रबार पूर्वपरराष्ट्रमन्त्री र परराष्ट्र मामिलाका जानकारहरुसँग छलफल गर्दैछन् ।  

नेपाल र भारतका परराष्ट्र मन्त्रालयबीच भएको सहमति अनुसार नै परराष्ट्रले भ्रमणका एजेण्डाबारे छलफल सुरु गरेको हो । १० पुसमा प्रधानमन्त्रीमा नियुक्त भएका प्रचण्डले यसअघि नै भारत भ्रमणमा जाने तयारी गरे पनि समय मिलेको थिए । प्रधानमन्त्रीको भारत भ्रमणबारे पूर्वपरराष्ट्रमन्त्री र परराष्ट्र मामिलाका जानकारहरुसँग छलफल गरेपछि नेपालले एक टोली भारत पठाउने तयारी भइरहेको पनि बताइएको छ ।  

भारत भ्रमणका क्रममा नेपालले उठाउने विषयहरु तयार भएपछि ति विषयमा दुई देशका परराष्ट्र मन्त्रालयबीच पनि छलफल हुनेछ । भ्रमणमा प्रधानमन्त्री, मन्त्री र सचिवस्तरमा हुने सहमतिको खाका तयार परेपछि नेपालबाट एक उच्च स्तरको टोली भारत पठाइने भएको छ । नेपलका प्रधानमन्त्री र भरतीय समकक्षीबीच हुने समझदारी र सहमतिका विषयहरु तयार पार्न परराष्ट्रमन्त्री साउदले आज विज्ञहरुसँग छलफल राखेका हुन् । 

परराष्ट्र मन्त्रालयले प्रधानमन्त्रीको भ्रमरणका क्रममा राख्नुपर्ने पर्ने एजेन्डा मागिसकेको छ । परराष्ट्रमन्त्री साउदले सबै मन्त्रालयलाई यसका लागि पत्राचार गरिसकेको बताइएको छ । विभिन्न मन्त्रालय अधिकारीहरुलाई पनि राखेर परराष्ट्रमन्त्री साउदले आज दिउसो २ बजे पूर्वपरराष्ट्रमन्त्रीहरूसँग परराष्ट्र मन्त्रालयमा छलफल गर्न लागेका छन् । प्रधानमन्त्रीको भ्रमणका विषयमा सुझाव दिन र नेपालले उठाउनुपर्ने विषयहरु निक्र्यौल गर्न उनीहरुकलाई बोलाइएको हो । प्रधानमन्त्रीभन्दा अगाडी एक पटक परराष्ट्रमन्त्री साउद पनि भारत जोन तयारीमा छन् ।