ढाकाकुमारको मुद्दामा सर्वाेच्चमा सुनुवाइ सुरू

५ जेठ, काठमाडौं । झापाका मेडिकल व्यवसायी दुर्गा प्रसाईसँग मन्त्री बन्नका लागि पार्टीमा नजराना बुझाउन घुस मागेको २ करोड घुस रकम माग गरेकाे अडियो बाहिरिएपछि सांसद पद गुमाएका राष्ट्रिय स्वतन्त्र पार्टी (रास्वपा)का निलम्बिवत सामानुपातिक सांसद ढाकाकुमार श्रेष्ठले दायर गरेको रिट निवेदनमाथि सर्वोच्च अदालतमा सुनुवाइ सुरू भएकाे छ ।

शुक्रबार सुनुवाइको पेसी न्यायाधीशद्वय अनिलकुमार सिन्हा र नहकुल सुवेदीको संयुक्त इजलासमा तेस्रो नम्बरमा परेको छ । अहिले सुनुवाइ जारी छ ।

अडियो बाहिरिएपछि श्रेष्ठलाई रास्वपाले पार्टीका साधारण सदस्यसमेत नरहने गरी सांसद पदबाट निलम्बन गरेपछि उक्त निर्णय बदरको मागसहित अन्तरिम आदेश जारी गरिपाउँ भन्दै श्रेष्ठले गएको वैशाख २४ गते रिट दायर गराएका थिए । सोही रिटमा आज अन्तरिम आदेश जारी गर्ने वा नगर्नेबारे निर्णय गर्नेछ । 

यसअघि वैशाख २५ गते न्यायाधीश तिलप्रसाद श्रेष्ठको एकल इजलासले अर्को छलफल नभएसम्मका लागि भन्दै अल्पकालीन अन्तरिम आदेश दिनुका साथै अन्तरिम आदेश जारी हुने वा नहुनेबारे दुवै पक्षलाई छलफलमा बोलाउने आदेश भएको थियो । सोहीबमोजिम अन्तरिम आदेशबारे आज सुनुवाइ हुँदैछ । मुद्दामा पार्टीको अनुशासन समिति लगायतलाई विपक्षी बनाइएको छ ।

रास्वपाले श्रेष्ठलाई निलम्बन गरेसँगै उनको स्थानमा एसिड पीडित विन्दावासीनी कंसाकारलाई नियुक्त गर्न निर्वाचन आयोगमा पत्र लेखेको थियो । सोहीबमोजिम आयोगले कंसाकारलाई नियुक्त समेत दिइसकेको छ । तर पदको शपथ नलिँदै सर्वोच्चको अल्पकालीन आदेश आएका कारण शपथ रोकिएको छ । 

आज सुनुवाइ भएर फैसला आएको खण्डमा कंसाकारको नियुक्त कायम रहन्छ वा रहँदैन भन्ने कुराको पनि टुंगो लाग्नेछ ।