नागरिक उन्मुक्ति सुदूरपश्चिम सरकारमा जाने, २ मन्त्री आज नियुक्त हुँदै

५ जेठ, धनगढी । नागरिक उन्मुक्ति पार्टी (नाउपा) सुदूरपश्चिम प्रदेश सरकारमा सहभागी हुने भएको छ । पार्टीको प्रदेश संसदीय दलका नेता घनश्याम चौधरीले शुक्रबार बिहान प्रधानमन्त्रीसहित पार्टी शीर्ष नेताहरुबीच भएको सहमति अनुसार २ मन्त्रालय लिएर पार्टी प्रदेश सरकारमा सहभागी हुने निर्णय  भएको बताए । 

सहमति अुनसार नाउपाले रामेश्वरलाई सामाजिक विकास र लक्ष्मण किशोरलाई भूमि व्यवस्था कृषि तथा सहकारी मन्त्रालयको जिम्मेवारीमा पठाउने भएको उनले बताए ।

मन्त्री बनाउनका लागि नाउपाले यसअघि नै संसदीय दलका नेता र प्रमुख सचेतकको जिम्मेवारी समेत फेरबदल गरिसकेको छ । यसअघि प्रमुख सचेतक रहेका रामेश्वरको ठाउँमा खुशीराम चौधरीलाई ल्याइएको छ । प्रमुख सचेतकको जिम्मेवारी हाल खुसीराम चौधरीले पाएका छन् । 

यस्तै माओवादी केन्द्रले पनि २ मन्त्री र एक राज्यमन्त्री पठाउने निर्णय गरेको छ । मुख्यमन्त्री कमलबहादुर शाहले उनीहरुलाई आजै नियुक्त गर्ने र उनीहरुको शपथ आजै हुने जनाइएको छ । मुख्यमन्त्री कमलबहादुर शाहले आजै मात्र आफ्नो कार्यकालको १०० दिने उपलब्धि सार्वजनिक गरेका छन् ।