कैदीबन्दीसँग रकम माग्ने मोरङ कारागारका जेलरको सरुवा

५ जेठ, काठमाडौं । जेलरले आफूहरुसँग निरन्तर रकम मागेको भन्दै मोरङ कारागारका कैदीबन्दीहरुले चलाएको लगातार आन्दोलन टुंगिएको छ । आरोपी ध्रुवप्रसाद कोइरालालाई कारागार प्रशासनले सरुवा गरेपछि उनीहरुले आन्दोलन रोकेका छन् । 

गृह मन्त्रालयको सचिव स्तरको बुधबारको निर्णयले कोइरालालाई इलाममा सरुवा गरिएको छ । बिरामी भएर उपचारमा जानका लागि जेलर कोइरालाले रकम माग्ने गरेको भन्दै कैदीबन्दीहरुले कोइरालाको सरुवाको माग गर्दै निरन्तर जेलभित्रै आन्दोलन गर्दै आएका थिए । विरोधमा उनीहरूले टाउको र हातमा कालो पट्टी बाँधेर धर्ना बसेका थिए । 

कोइरालाले कारागारमा भ्रष्ट्राचार गरेको, कारागारभित्र आउने र कारागारबाट जाने उपभोग्य वस्तुमा कमिसन खाएको आरोप थियो । काेइरालाकाे सरूवा भएसँगै कैदीबन्दीहरूले आन्दोलन रोकेका हुन् ।