पुँजी पलायनलाई रोक्दै अन्तर्राष्ट्रिय सहायतालाई ठूला परियोजनामा केन्द्रित गरिने

५ जेठ, काठमाडौं । सरकारले पुँजी पलायनलाई कडाइका साथ नियन्त्रण गर्ने भएको छ । आर्थिक वर्ष ०८०/८१ को नीति तथा कार्यक्रम सार्वजनिक कार्यक्रममा राष्ट्रपति रामचन्द्र पौडेलले यस्तो बताएका हुन् । अहिले अवैध रुपमा भइरहेको हुन्डीलगायत कारोबारलाई कडाइका साथ नियन्त्रण गरिने राष्ट्रपति बताएका छन् ।

विभिन्न कारण र माध्यमबाट नेपालबाट विदेशमा पुँजी पलायन भएको विश्लेषण भइरहेको बेला सरकारले नीति तथा कार्यक्रममा पुँजी पलायनलाई नियन्त्रण गर्ने नीति ल्याएको हो । यस्तै सरकारले  अन्तर्राष्ट्रिय सहायतालाई ठूला परियोजनामा केन्द्रित गर्ने भएको छ ।

सार्वजनिक ऋणको अधिकतम प्रतिफल प्राप्त हुने गरी उपयोग गरिने बताइएको छ । अन्तर्राष्ट्रिय सहायतालाई राष्ट्रिय गौरव, रुपान्तरणकारी र उच्च प्राथमिकता युक्त आयोजनाको सञ्जालमा केन्द्रित गर्ने राष्ट्रपति पौडेलले बताए । उनका अनुसार आगामी आर्थिक वर्षमा ऋणको आयोजनागत विनियोजन गरिनेछ ।