काठमाडौं नदी किनाराको जग्गा खाली गर्ने सरकारको घोषणा

५ जेठ, काठमाडौं । सरकारले काठमाडौंसहितका नदी किनारासहित सरकारी जग्गा खाली गराउने भएको छ । सरकारको तर्फबाट शुक्रबार संघीय संसदको संयुक्त बैठकमा आर्थिक वर्ष २०८०/०८१ को नीति तथा कार्यक्रम प्रस्तुत गर्दै राष्ट्रपति रामचन्द्र पौडेलले काठमाडौं उपत्यकासहितका स्थानका नदी किनारासहितका सरकारी जग्गा खाली गर्ने बताएका हुन् । 

नदी किनारामा रहेका बस्तीहरुको उचित स्थानमा स्थानान्तरण गरेर जग्गा खाली गर्ने राष्ट्रपति पौडेलले जानकारी दिए । सरकारको यो नीतिबाट काठमाडौं महानगरपालिकाले लिएको ‘खुला नदी’ अभियानमा सहयोग ठानिएको छ । महानगरले अहिले टुकुचा खोला किनार र छोपेर बनाइएको भौतिक संरचना हटाउने र जग्गाको लगत कट्टा प्रक्रियालाई अगाडि बढाइरहेको छ ।