अनसनरत कांग्रेस सांसद सञ्जय गौतमको स्वास्थ्य अवस्था गम्भीर, जीवनरक्षाका लागि आयोगको ध्यानाकर्षण

६ जेठ, काठमाडौं । अनसनरत नेपाली कांग्रेसका नेता तथा सांसद सञ्जय गौतमको स्वास्थ्य अवस्था गम्भीर बन्दै गएको छ । उनी बर्दियाको जब्दी पुलमुनि आमरण अनसनमा बसेको लामो समय भइसक्दा पनि सरकारको ध्यान त्यसतर्फ गएको छैन । 

पप्पु कन्स्ट्रक्सनले बनाएको यो पुल २०७४ सालमै भत्किएपछि बार बर्दियाका जनताले सदरमुकाम पुग्न सास्ती खेपिरहेको भन्दै उनी अनसनमा बसेका हुन् । पुल बनाउने माग राखेर अनसनमा बसेको गौतमको अहिले स्वास्थ्य अवस्था निकै जटिल बनेको छ । 

जब्दीघाटमा डुंगा सञ्चालन गर्न अनुमति पाएका ठेकेदारले काठको पुल हालेको छ । जहाँ एक जना मान्छे तरेको दश रूपैयाँ लाग्छ । साइकल र मान्छे तर्दा २० रूपैयाँ लाग्छ । मोटरसाइकलमा एक जनाको  २५ रूपैयाँ र दुई जनाको ३५ रूपैयाँ लाग्छ । अटो रिक्सा तारेको ५० रूपैयाँ लिने गरिन्छ । यो अवस्था हटाउने माग राखेर गौतम अनसनमा बसेका हुन् । 

यसै बीच राष्ट्रिय मानव अधिकार आयोगले अनशनरत प्रतिनिधिसभा सदस्य सन्जयकुमार गौतमको जीवन रक्षा गर्न आग्रह गरेको छ । आयोगले एक विज्ञप्ति जारी गर्दै सात दिनदेखि अनसनमा रहेका बर्दिया–१ का सांसद गौतमको स्वास्थ्य अवस्थाप्रति ध्यानाकर्षण भएको जनाउँदै वार्ताबाट समस्या समाधान गर्न आग्रह गरेको हो ।

आयोगले अनुगमनका क्रममा गौतमको शरीरमा पानीको मात्रा कम भई पिसाबमा समस्या देखिएको जनाएको छ । सांसद गौतमको स्वास्थ्य अवस्था गम्भीर रहेको र जीवन नै जोखिममा पर्न सक्ने अवस्था रहेको विज्ञप्तिमा उल्लेख छ । 

‘विकास प्रक्रियामा देखा परेका समस्याहरूको समाधान सहभागितामूलक प्रक्रियाबाट गरिनु राज्यका निकायहरूको कर्तव्य हुन्छ । अतः सांसद गौतमले उठाएका उचित मागहरूको सार्थक वार्ता र संवादको माध्यमबाट सम्बोधन गरी आमनागरिकको विकासको अधिकारको सुनिश्चतता गर्न र अनशनरत गौतमको स्वास्थ्यप्रति संवेदनशील भई निजको जीवनको रक्षा गर्न आयोग नेपाल सरकारलाई आग्रह गर्दछ,’ विज्ञप्तिमा भनिएको छ । 

बबई सिँचाइ आयोजना, राजापुर सिँचाइ परियोजना, मध्यवर्ती क्षेत्रका नागरिकको जीउधनको सुरक्षासहितका माग राखेर सांसद गौतम अनसनमा छन् । सरकारले अहिलेसम्म उनीसँग छलफल समेत नगरेको बताइएको छ । यो क्षेत्रका नेताहरूले पनि उनको स्वास्थ्य अवस्थाबारे सरकारको ध्यानाकर्षण गराइरहेका छन् ।