उद्यमी बन्न चाहनेलाई बालेनको अवसर, महानगरमा योजना पेस गर्न आग्रह

६ जेठ, काठमाडौं । काठमाडौं महानगरपालिका मेयर बालेन शाहले महानगरको आइडिया बैंकमा नयाँ योजना लिएर आउन आग्रह गरेका छन् । काठमाडौं महानगरपालिकाले सहयोग गर्ने भन्दै नयाँ योजना भए प्रस्तुत गर्न उनले आग्रह गरेका हुन् । 

व्यवसायमुखी आइडिया भए र त्यसलाई व्यवसायमा परिणत गर्न चाहना भए त्यस्ता योजना लिएर आउन पनि उनले आग्रह गरेका छन् । 

नयाँ योजना भए कसैले पनि उद्यमी हुन रोक्न नसक्ने काठमाडौं महानगरका मेयर बालेन शाहले बताएका छन् । उनले महानगरपालिकाको वर्ष २०७९/८० को नीति तथा कार्यक्रममा समावेश भएको आइडिया बैंक कार्यक्रम कार्यान्वयनमा ल्याउन लागेको बताएका छन् । 

आइडिया बैंक कार्यक्रमको उद्देश्य दक्ष/अदक्ष जनशक्ति, विद्यार्थी, लगानीकर्ता तथा उद्यमशीलता विशेषज्ञहरूको ब्रिजको रूपमा महानगरबासी सोचलाई योजना र योजनालाई व्यवसाय बनाउने रहेको छ । 

‘तपाईँसँग आइडिया छ, तपाईँ महानगरभित्र कुनै स्टार्टअप सुरु गर्नुभएको छ र तीन वर्ष कटेको छैन । तपाईँ विद्यार्थी हुनुहुन्छ तपाईँसँग महानगरको समस्या समाधानका व्यवसाय मुखी आइडिया छन् र त्यसलाई व्यवसायमा परिणत गर्न चाहनुहुन्छ, बालेनले भनेका छन ।्’

‘कसरी त्यसको विजनेस प्लान बनाउने, कार्यान्वयनको योजना बनाउने । कसरी लगानी जुटाउने त्यसमा यस कार्यक्रमले पूर्ण सहयोग गर्छ । विभिन्न विषयगत क्षेत्रहरूलाई समेटी पाँच वटा क्याटगोरीमा आवेदन माग गरिएको छ ।’ जेठ १९ गतेसम्म आवेदन दिन बालेनले आग्रह गरेका छन् ।