संविधानलाई पुर्णरुपले कार्यान्वयन र संरक्षण नगरे देशमा अनिष्ट हुन्छः पूर्वराष्ट्रपति यादव

६ जेठ, काठमाडौं । नेपालका प्रथम राष्ट्रपति डा. रामवरण यादवले नेपालको संविधानलाई पूर्ण रुपले कार्यान्वयनमा लानुपर्ने बताएका छन् । उनले अहिलेको संविधानमाथि चौतर्फी आक्रमणको संकेत देखिएको र यसको संरक्षण र कार्यान्वयन महत्वपूर्ण भएको बताएका छन् । 

शुक्रबार काठमाडौंमा वरिष्ठ अधिवक्ता डा. चन्द्रकान्त ज्ञवालीद्वारा लिखित पुस्तक नेपालको संविधानको व्याख्या भाग १ र २ को विमोचन कार्यक्रमलाई सम्बोधन गर्दै उनले अहिले नै संविधानको पुनर्मूल्यांकनको बेला नभएको बताए । 

यादवले संविधानमाथि अहिले नै प्रश्न उठाउने समय नभएको बताए । उनले संविधान कार्यान्वयनका लागि धेरै काम बाँकी भएको भन्दै यसमा अपुग भएका विषयलाई थप्दै जान सकिने बताए । संविधान भर्खर कार्यान्वयनको दिशामा अगाडि बढिरहेका बेला यसको पुनः विचार गर्नुपर्छ भनेर जुन हल्ला चलाइएको छ त्यो समय सान्दर्भिक नभएको उनको भनाइ छ ।  

उनले अहिले पूर्ण रूपमा संविधान लागु गरेर जाने समय रहेको बताए । वर्तमान संविधानको कार्यान्वयन सही ढंगबाट गर्न बाँकी नै रहेको उनको भनाइ छ । प्रथम राष्ट्रपति यादवले वर्तमान संविधानलाई संरक्षण गरेर लैजान नसके देशलाई सम्हाल्न गाह्रो हुने दाबी गरे । 

उनले भूराजनीति, अन्तर्राष्ट्रिय परिप्रेक्ष्य, लोकतान्त्रिक व्यवस्था र कानुनको शासनलाई सोचेर नै संविधान बनाइएको भन्दै यसलाई पूर्ण कार्यान्वयन गर्न जरुरी रहेको उल्लेख गरे । यादवले यो संविधान तलमाथि भएको खण्डमा अहिले प्राप्त कुनै पनि अधिकार नरहने उनको भनाइ छ ।