हामी तीन नेता देशमा केही गरौँ भन्नकै लागि बसेका हौँः प्रधानमन्त्री

६ जेठ, काठमाडौं । प्रधानमन्त्री पुष्पकमल दाहाल प्रचण्डले प्रमुख दलका प्रमुख नेता देशको समस्या समाधानका उपाय खोज्न र सरकार एवं सदनलाई प्रभावकारी रुपमा सञ्चालन गर्नकै लागि लगातार बैठकमा बसिरहेको बताएका छन् । उनले सत्तापक्ष र प्रमुख प्रतिपक्षका नेताहरू बैठकमा बस्नुलाई नराम्रो दृष्टिकोणबाट लिन नहुने उनकाे भनाइ छ । 

शनिबार काठमाडौंमा अखिल नेपाल ट्रेड युनियन महासंघको पदस्थापन कार्यक्रमलाई सम्बोधन गर्दै प्रधानमन्त्री प्रचण्डले सत्तापक्ष र प्रमुख प्रतिपक्षका नेताहरूको बैठक बस्दा भ्रष्टाचार प्रकरणलाई सामसुम बनाउन लागेको हो कि भन्ने शंका गर्ने गरिएको भन्दै आफूहरू सदनलाई प्रभावकारी बनाउन र परिवर्तनलाई उल्ट्याउने प्रयत्नविरूद्ध एकजुट हुनका लागि बैठक बसिरहेको बताए ।

प्रधानमन्त्री प्रचण्डले अहिले संघीय लोकतान्त्रिक गणतन्त्रमाथि हिलो छ्याप्ने कोसिस भइरहेको बताउँदै अहिलेको उपलब्धि खोसिए सबैका सबै कुरा खोसिने बताए । उनले तीन दलका नेता बीचको सहमतिबाट मात्र हुन सक्ने भएकाले बैठक बसेको बताए । सत्तापक्ष र प्रमुख प्रतिपक्षका नेताहरु बस्दा यो अभियान र आन्दोलनलाई सामसुम पार्न बसेका हुन् कि भनेर शंका गर्ने गरिएकोमा उनले आश्चर्य प्रकट गरे । 

देशमा एक थरी मानिसहरू नेपाली जनताले झन्डै ७ दशक भन्दा बढी संघर्ष गरेर प्राप्त परिवर्तनलाई उल्ट्याउने, संघीय लोकतान्त्रिक गणतन्त्रमाथि हिलो छ्याप्ने कोशिस भइरहेको छ र यसरी बस्नुको तात्पर्य १२ बुँदे समझदारी हुँदै विस्तृत शान्ति सम्झौता र संविधानको घोषणामा एक साथ उभिएका दलहरू फेरि एक ठाउँ उभिनु पर्ने स्थिति आउन सक्छ भनेर तीन नेताको बैठक बस्ने गरेको उनको भनाइ छ ।  

प्रधानमन्त्री प्रचण्डले पुँजीबजार सम्बन्धीका सेटिङहरू पनि भत्काएको बताए । सरकारले अहिले राजश्व वृद्धि गर्न र अर्थतन्त्रलाई सुदृढ बनाउन पहल थालेको उनको भनाइ छ । उनले सरकारले रेमिट्यान्सको वृद्धि गर्न पनि काम गरिरहेको समेत बताए । पुँजीबजार सम्बन्धी त्यहाँ हुने सबै सेटिङहरुलाई हामीले भत्काएका छौँ । राजश्व वृद्धि गर्न त्यसलाई अलि सुदृढ गर्न कडा कदम चाल्नेतिर अघि बढेका छौँ । रेमिट्यान्सको वृद्धि गर्न गम्भीर कदम चालेका छौँ,’ उनले भने ।