सरकारको नीति तथा कार्यक्रम दिशाहीन छः ओली

७ जेठ, काठमाडौँ । नेकपा एमालेका अध्यक्ष एवं प्रमुख प्रतिपक्षी दलका नेता केपी शर्मा ओलीले सरकारले आगामी आर्थिक वर्षका लागि ल्याएको नीति तथा कार्यक्रमले मुलुकलाई दिशाहीन बनाएको बताएका छन् । नीति तथा कार्यक्रम उत्साहजनक नरहेको उनको टिप्पणी छ । आइतबार प्रतिनिधिसभामा सरकारले आगामी आर्थिक वर्षका लागि प्रस्तुत गरेको नीति तथा कार्यक्रमप्रति उनले कटाक्ष गरेका छन् । 
 
अध्यक्ष ओलीले सर्वसाधारणले उपभोग गर्ने सामग्रीको मूल्य १५ देखि २५ प्रतिशतसम्म वृद्धि भएको बताए । निर्यात २६ प्रतिशतले घटेको र आयात १८ प्रतिशतले घट्दा विकास निर्माणका सामग्री, औद्योगिक कच्चा पदार्थ, विद्युत् तथा सञ्चार उपकरण, कृषि उपकरण, निर्यात गरिने कच्चा पदार्थका सामग्री अभाव हुन थालेको अवस्थामा नीति कार्यक्रमले लक्ष्य नलिएको बताए । 

तरलताको अभाव, उच्च ब्याजदर, ऋण नतिर्नेलाई राजनीतिक संरक्षण, व्यवसायीको खस्केको मनोबल लगायतका यथार्थहरूलाई संबोधन गर्ने गरी नीति तथा कार्यक्रम नआएको उनको भनाइ छ । सरकारले सार्वजनिक गरेको नीति तथा कार्यक्रम उच्च आर्थिक वृद्धि हासिल गर्ने कुनै योजना नै नभएको अध्यक्ष ओलीको दावी छ । आधुनिक पूर्वाधार निर्माणका कार्यहरू तीव्र गतिमा अघि बढाउने उत्साह नै नभएको टिप्पणी गरे । 

ओलीले प्रधानमन्त्री पुष्पकमल दाहाल प्रचण्डले सरकार बनाएको दुई महिना नपुग्दै मुटु प्रत्यारोपण गर्न लागेको बताए । उनले पुस १० गते एमालेको पहलकदमीमा विभिन्न दलको समर्थनमा प्रधानमन्त्री बनेका प्रचण्डले दुई महिना नपुग्दै मुटु प्रत्यारोपण गर्नतिर लागेको बताए । उनले अहिले सरकारको मुटु प्रत्यारोपण भइसकेको भन्दै नीति तथा कार्यक्रममा समर्थन जनाउन आफूले नीति तथा कार्यक्रम सुनेको बताए ।

‘दुई महिना पुग्दा नपुग्दै सरकारको मुटु प्रत्यारोपणतिर लाग्नुभयो । मुटु प्रत्यारोपण भइसकेको भए पनि नेतृत्व उहाँकै भएकाले नीति तथा कार्यक्रमको समर्थन गर्ने विशाल हृदयका साथ मैले नीति तथा कार्यक्रम नामक दस्तावेज सुनेँ र पढेँ,’ ओलीले भने । ओलीले राजस्व संकलनका लागि सरकारले अन्तर्राष्ट्रिय समुदायलाई गुहारेको भन्दै आपत्ति जनाए । उनले प्रधानमन्त्री पुष्पकमल दाहाल ‘प्रचण्ड’ले यही जेठ १ गते कूटनीतिक समुदायलाई गरेको ‘ब्रिफिङ’मा राजस्व संकलन गर्न कठिनाइ भएको बताएको भन्दै असन्तुष्टि जनाए ।

उनले सरकार आफ्नो प्रारम्भिक कार्यक्रममै असफल भएको टिप्पणी गरे । नीति तथा कार्यक्रम असफल दस्तावेज भएको ओलीको आरोप छ । ओलीले कालापानी क्षेत्रको अवस्थाका बारेमा सरकारसँग प्रश्न गरे । ओलीले अहिले सम्बोधन गरिरहेका छन् । उनले सम्बोधनको क्रममा भने, “कालापानी क्षेत्रको अवस्था के छ ? सीमा सुरक्षित नै छ ? देशको सीमाको बारेमा बोल्दा फाँसी किन नदिइएको भनेर टीभीले भन्यो ? अझ दुर्भाग्यपूर्ण त के छ भने देश असामान्य अवस्थामा पुगेको यथार्थलाई सरकारले लुकाउन खोजेको छ । लुकाउन मात्र हैन रोम जलिरहेछ, निरो बाँसुरी बजाइरहेछ ।’