जनताको दुःखको कारण बन्यो सत्ता गठबन्धन: ओली

७ जेठ, काठमाडौं । प्रमुख प्रतिपक्षी दलका नेता तथा एमाले अध्यक्ष केपी शर्मा ओलीले वर्तमान सत्तारुढ गठबन्धन  देश र जनताको लागि दुःखको कारण भएर आएको बताएका छन् । सरकारसँग अर्थतन्त्रलाई वृद्धि गर्ने कुनै योजना नभएको र खासमा सरकारसँग कुनै नीति नै नभएको उनको भनाइ छ ।

प्रतिनिधिसभाको आइतबारको बैठकमा प्रमुख प्रतिपक्षी दलका नेता ओलीले अर्थतन्त्र ध्वस्त वर्तमान सत्ता गठबन्धनका कारण भएको बताए । उनले ेशलाई ओह्रालो ल्याउनका लागि, अर्थतन्त्रलाई ध्वस्त बनाउनका लागि यो गठबन्धन बनेको बताए । उनले यो गठबन्धन देश र जनताका लागि बनाएको कि देश र जनतालाई कष्ट दिनका लागि बनाएको र दुःखको कारण भएको दोहोर्याए । 

ओलीले वर्तमान गठबन्धन नै अर्थतन्त्रको संकटको कारक भएको बताए । ’नेकपा (एमाले)को सरकारलाई विस्थापन गरी बनेको कांग्रेस–माओवादी केन्द्रसहितको गठबन्धन सरकार नै हाम्रो अर्थतन्त्रलाई संकटको डिलमा पुर्याउने प्रमुख कारक हो,’ उनले भने, ’प्रधानमन्त्रीज्यूलाई लागेको होला यो सरकार राम्रो छ, सफल छ भनिदिए हुन्थ्यो । तथ्यांकहरूले त्यस्तो बोल्दैनन् ।’

सरकारसँग नीति र कार्यक्रम नै नभएको ओलीको भनाइ थियो । उनले सरकार नीति शून्यतामा अगाडि बढेको बताए । सरकारले ल्याएको नीति तथा कार्यक्रममा आर्थिक वृद्धिका योजना नै नभएको उनले बताए । यो प्रस्तावित नीतिमा उच्च दरको आर्थिक वृद्धि हासिल गर्ने कुनै योजना नै छैन र आधुनिक पूर्वाधार निर्माणका कार्यहरू तीव्र गतिमा अगाडि बढाउने उत्साह नै नभएको बताए । 

 उनले भने,‘सामाजिक न्याय कायम गर्ने दृष्टिकोण पनि छैन । संक्षिप्तमा भन्दा नीति तथा कार्यक्रमको उद्देश्य छैन । कहाँ पुग्ने भन्ने गन्तव्य छैन । कसरी जाने मार्गचित्र छैन । सर्वत्र नीति शून्य नीतिको अवस्था छ । अहिलेको सरकारको नीति के हो भने नीति शून्य नीति,’ उनले भने, ’यस्तो नीति तथा कार्यक्रमले देशलाई गति दिन सक्दैन, राष्ट्रलाई अग्रगमनको गन्तव्यमा पु¥याउन सक्दैन । राष्ट्रले भोगिरहेका समस्या, जनताले भोगिरहेका समस्याहरूलाई सम्बोधन गर्न पनि सक्दैन ।’