कालापानीबाट भारतीय सेना हटाउने र १८ वर्षको युवालाई सैन्य तालिम दिने विषय नीतिमै आउनुपर्छ : सांसद सुवाल

७ जेठ, काठमाडौं । नेपाल मजदुर किसान पार्टी (नेमकिपा)का सांसद प्रेम सुवालले नेपाली भूमि कालापानीबाट भारतीय सेनालाई तत्काल हटाउनुपर्ने बताएका छन् । प्रधानमन्त्री प्रचण्डले प्रतिनिधिसभाको बैठकमा पेस गरेका सरकारको नीति तथा कार्यक्रममाथि संशोधन प्रस्ताव राख्दै यस्तो बताएका हुन् । 

उनले भारतले राणकालीनदेखि नै नेपालमाथि हस्तक्षेप जारी राखेको भन्दै अहिले सरकारको नेतृत्वकै कारण हस्तक्षेप बढेको बताए । उनले १८ वर्ष पूरा भएका युवाहरुलाई सैन्य तालिम दिने व्यवस्था नीति तथा कार्यक्रममा राख्नुपर्ने बताए ।

यस्तै सांसद सुवालले पञ्चायतकालदेखिका प्रधानमन्त्री र मन्त्रीहरुको सम्पत्ति छानबिन गर्ने विषय समावेश गर्न सुझाव दिएका छन् । नेपालको ढुंगा गिट्टी भारतसँगको सीमामा पर्खाल लगाउन उपयोग गरिनु पर्नेमा जोड दिए । साथै विज्ञापन र पात्रोमा नेपाली भाषा मात्र प्रयोग गर्नेसम्बन्धी व्यवस्था हुनुपर्ने बताए ।