रास्वपाका सांसद विकास कोष नब्यूँताउने पक्षमा

७ जेठ, काठमाडौं । राष्ट्रिय स्वतन्त्र पार्टी (रास्वपा) सांसद विकासको विपक्षमा उभिएको छ । सरकारले ल्याउने तयारी गरिरहेको आगामी आर्थिक वर्ष २०८०/८१ बजेटमा सत्तारुढ दलका सांसदहरुले सांसदको निर्वाचन क्षेत्रमा खर्च पाउने गरी वितरित कोषलाई ब्यूँताउने जोड गरिरहेका बेला प्रतिपक्षी रास्वपाले विरोध गरेको हो । 

प्रधानमन्त्रीले आइतबार प्रतिनिधिसभाको बैठकमा पेस गरेका सरकारको आगामी नीति तथा कार्यक्रममाथि संशोधन प्रस्तावसहित छलफलमा भाग लिँदै सांसद सुमना श्रेष्ठले सांसद विकासको कोष पुनःस्थापना गर्ने कुरामा कुनैपनि हालतमा सहमत हुन नसक्ने बताइन् । उनले कोष संचालन गरिए सांसद आफ्नो कामबाट बाहिर पुग्ने बताइन् ।

सांसद विकास कोषको रकम दुरुपयोग भएको भन्दै यसअघिका सरकारले खारेज गरेको थियो । अहिले फेरि नेपाली कांग्रेसका सांसदहरुले कोष ब्यूँताउने विषयमा छलफल सुरु गरेको समाचार बाहिरिएपछि एमाले, रास्वपा र माओवादी केन्द्रका सांसदरुले विरोध गरेका छन् । 

सांसद श्रेष्ठले आगामी आवमा सरकारले एउटा पनि गाडी नकिन्ने र निजी क्षेत्रलाई सवारीसाधन खरिद रोक्नुपर्ने बताइन् ।