नीति र कार्यक्रम शानदार र वैज्ञानिक छ : जनार्दन शर्मा

७ जेठ, काठमाडौं । माओवादी केन्द्रका सांसद एवं पूर्वमन्त्री सरकारले ल्याएको नीति तथा कार्यक्रममा नीतिगत र संरचनागत सुधार गरेर विकास र समृद्धिको मर्म बोकेको बताएका छन् ।

प्रधानमन्त्री प्रचण्डले आइतबार प्रतिनिधिसभाको बैठकमा पेस गरेका आगामी आवको नीति तथा कार्यक्रममाथिको छलफलमा भाग लिँदै सांसद शर्माले यस्तो बताएका हुन् । 

उनले सरकारले अर्थतन्त्रलाई उकास्ने र जनताको जीवनसँग जोडेर कार्यक्रम ल्याएको बताउँदै आफूले समर्थन गर्ने बताए । कृषिको उत्पादकत्व बढाउने नीति कुनै पुलिन्दा नभई आवश्यकता भएको बताए । 

‘रोजगारी र कृषिलाई प्राथमिकतामा राखेर कार्यक्रम ल्याउने कुरा के खिसिट्यूरी गर्ने विषय हो र’ उनले भने । सबै बालबालिकालाई विद्यालयमा ल्याएर सिकाउने र टिकाउने तथा पढ्दै कमाउँदै भनेर सरकारले ल्याएको नीति उदाहरणीय भएको उनको भनाइ थियो । सरकारले ल्याएको नीति तथा कार्यक्रम शानदार र वैज्ञानिक रहेको उनले बताए ।

प्रमुख प्रतिपक्षी दल एमालेले नीति तथा कार्यक्रमको चर्को विरोध गरिहँदा सरकारको नेतृत्व गरिररहेको माओवादी केन्द्र र सत्तारुढ दलका नेताहरुले नीति र कार्यक्रमको बचाउ गरेका छन् । 

सरकारले ल्याएको आगामी आवको नीति तथा कार्यक्रम गएको शुक्रबार राष्ट्रपति रामचन्द्र पौडेलले संसदको संयुक्त बैठकमा प्रस्तुत गरेका थिए ।