वीरगन्ज चिनी कारखाना संचालन गर्ने नीति समेटन सरकारसँग माग

७ जेठ, काठमाडौं । सांसद प्रदीप यादवले सरकारले वीरगन्ज चिनी कारखाना संचालन गर्नेबारे विषय नीति तथा कार्यक्रममा नसमेटेको भन्दै सरकारको ध्यानाकर्षण गराएका छन् । 

सरकारको आगामी आवको नीति तथा कार्यक्रममा थुप्रै रुग्न उद्योग संचालन गर्ने नीति लिएको तर वीरगन्ज चिनी कारखानाबारे मौन बसेको भन्दै ध्यानाकर्षण गराएका हुन् ।

प्रधानमन्त्री प्रचण्डले आइतबार प्रतिनिधिसभाको बैठकमा पेस गरेका आगामी आवको नीति तथा कार्यक्रममाथि संशेधन प्रस्ताव राख्दै सांसद यादवले सरकारले बन्द भएका सबै उद्योग र कारखाना संचालन गर्नुपर्ने बताए । 

अर्को प्रसंगमा यादवले संघीयता जनताले रगत बगाएर ल्याएको भन्दै यसलई भत्काउन संसदमा आवाज उठेको भन्दै चिन्ता व्यक्त गरे । ‘संघीयता वा प्रदेश संरचना नेपाली जनताले रगत बगाएर ल्याएको हो, सक्नुहुन्छ भने सडकमा गएर संघीयताविरुद्ध आन्दोलन गरेर देखाउनुस्’ सांसद यादवले भने ।