अरुण भ्यालीलाई शतप्रतिशत हकप्रद शेयर जारी गर्न आयोगको स्वीकृति

७ जेठ, काठमाडौं । अरुण भ्याली हाइड्रोपावर डेभलपमेन्टलाई शतप्रतिशत हकप्रद शेयर जारी गर्न पूर्वस्वीकृति दिइएको छ । यही जेठ ५ गते विद्युत नियमन आयोगबाट स्वीकृति पाएको हो ।

विद्युत नियमन आयोगका अनुसार कम्पनीको हाल कायम रहेको चुक्ता पुँजी १ अर्ब ८६ करोड ७९ लाख ६२ हजार रहेको छ। कम्पनीले सोही बराबरको हकप्रद सेयर जारी गर्ने स्वीकृति पाएको हो । 

हकप्रद जारीपछि कम्पनीको चुक्ता पुँजी ३ अर्ब ७३ करोड ५९ लाख २५ हजार पुग्नेछ । स्वीकृति कार्यान्वयनका लागि आगामी वार्षिक साधारण सभामा प्रस्तावमा लैजाने बाटो खुलेको छ ।

सभाबाट पारित भइसकेपछि हकप्रदका लागि नेपाल धितोपत्र बोर्डमा आवेदन दिनेछ । यो कम्पनीले पछिल्लो १० आर्थिक वर्षमा लगानीकर्तालाई ५ देखि १५ प्रतिशतसम्म लाभांश वितरण गर्दै आइरहेको छ।