नक्कली भुटानी शरणार्थी प्रकरण : आङटावाविरुद्ध प्रहरीमा ५ वटा किटानी जाहेरी

७ जेठ, काठमाडौं । नक्कली भुटानी शरणार्थी प्रकरणमा पक्राउ परेका कांग्रेस नेता एवं पूर्वसभासद आङटावा शेर्पाविरुद्ध ५ जनाले किटानी जाहेरी परेका छन् ।

दोलखाका ५ जना पीडितले आफूहरूलाई नक्कली भुटानी शरणार्थी बनाएर अमेरिका पठाइदिने भन्दै रकम असुलेर ठगी गरेको भन्दै शेर्पाविरुद्ध जाहेरी दिएका छन् । शेर्पाविरुद्ध दोलखा, रामेछाप र ओखलढुंगाका व्यक्तिहरूलाई अमेरिका पठाइदिने भन्दै रकम लिएको आरोप छ ।

त्यसमाथि प्रहरीले अनुसन्धान जारी राखेको छ । पक्राउ पूर्जी जारी भएपछि शेर्पा यही जेठ १ गते प्रहरी समक्ष आत्मसमर्पण गरेका थिए । त्यस यता उनी हिरासतमै छन् । प्रकरणमा १६ जना पक्राउ परिसकेका छन् भने १६ जना फरार सूचीमा छन् ।

जिल्ला प्रहरी परिसर काठमाडौंका अनुसार प्रहरीले नक्कली भुटानी शरणार्थी प्रकरणको अनुसन्धान सकेर आइतबार नै सरकारी वकिल कार्यालयमा प्रतिवेदन बुझाउने तयारी गरिरहेको अन्तिम समयमा आज जाहेरी परेको प्रहरीले जनाएको छ ।