सानिमा इन्स्योरेन्सको साधारणसभा जेठ ३२ गते, बुक क्लोज कहिले ?

८ जेठ, काठमाडौ । सानिमा जीआइसी इन्सुरेन्सले जेठ ३२ गते साधारण सभा बोलाएको छ । सभामा संस्थापक सेयरधनीको तर्फबाट ३ जना र सर्वसाधारण सेयरधनीको तर्फबाट ३ जना सञ्चालकको निर्वाचन गर्ने एजेन्डा छ । आर्थिक वर्ष २०७/७९ को वार्षिक प्रतिवेदन माथि पनि छलफल हुनेछ । सो सभा अमृतभोग कालिकास्थान, काठमाडौंमा बिहान ११ बजेवाट सुरु हुनेछ । 

आर्थिक वर्ष २०७९/८० को लागि लेखापरिक्षक नियुक्त गर्ने प्रस्ताव पनि रहेको छ । कम्पनीले यसपटक पनि शेयरधनीलाई कुनै पनि लाभांश वितरण नगर्ने भएको छ । यसर्थ, यो पटक कम्पनीका शेयरधनीको हात खाली हुनेछ । 

साधारण सभा प्रयोजनका लागि कम्पनीले जेठ १२ गते बुक क्लोज गर्दैछ । जेठ ११ गतेसम्म कायम सेयरधनीहरु सभामा भाग लिन योग्य हुनेछन् । गएको कात्तिक ७ गतेबाट सानिमा जनरल र जनरल इन्सुरेन्स एक आपसमा मर्ज भएर सानिमा जीआइसी इन्सुरेन्सको नामबाट एकीकृत कारोबार सुरु भएको थियो ।