प्रधानमन्त्रीलाई माधव नेपालको सुझावः ‘सबै वडाका खेलमैदान एकैपटक स्वीच थिचेर शिलान्यास गर्ने भूल नगर्नुस्’

८ जेठ, काठमाडौं । नेकपा (एकीकृत समाजवादी) अध्यक्ष समेत रहेका  तथा पूर्वप्रधानमन्त्री माधवकुमार नेपालले सरकारले ल्याएको आगामी आर्थिक वर्षको नीति तथा कार्यक्रममाथि धारणा राख्दै प्रधानमन्त्री प्रचण्डलाई विभिन्न सुझाव दिएका छन् । 

प्रधानमन्त्रीले आइतबार प्रतिनिधिसभाको बैठकमा पेस गरेका नीति तथा कार्यक्रममाथिको छलफलमा सोमबार भाग लिँदै नीति तथा कार्यक्रम दूरगामी र प्रभावकारी किसिमका रहेको बताए । देश भरका सबै वडा खेल मैदान र पालिकामा कभर्ड हल निर्माण गर्ने कार्यक्रम र देशभित्रै मल कारखाना बनाउने नीति निकै राम्रो भएको बताए । नीति र कार्यक्रमलाई कार्यान्वयन मात्र गर्न सके देशले आर्थिक विकासमा उल्लेख्य प्रगति गर्न सकिने बताए ।

मालेका अध्यक्ष केपी ओलीप्रति लक्षित गर्दै अध्यक्ष नेपालले सरकारको ल्याएको नीति तथा कार्यक्रमलाई केही मान्छेले शून्य मात्र देखेको बताए । ‘स्वार्थी र व्यक्तिवादको रोगबाट हेर्दा सबै कार्यक्रम शून्यबाहेक अन्य केही नदेख्ने रहेछन्’ नेपालले भने, ‘घर घरमा ग्यास पाइप, टिकट काट्नुस् रेल चढ्नुस् भन्नेहरूको नीति तथा कार्यक्रमको हालत सबै देखेकै छन् । भनिरहनु पर्दैन ।’

‘तर प्रधानमन्त्रीलाई मेरो सुझाव छ, तपाईँले देशभरका सबै वडाका खेलमैदान एकैपटक स्वीच थिचेर शिलान्यास गर्ने भूल नगर्नुस्’ नेपालले भने । शिलान्यास र उद्‍घाटनमा आफ्नो नाममा पार्ने लोभमा एकै ठाउँबाट स्वीच थिच्ने संस्कारले ठीक ठाउँमा नपुर्याउने उनको सुझाव छ ।

यस्तै, अध्यक्ष नेपालले प्रधानमन्त्री बनेका सबैले आफूले गरेका कामहरूबारे संसदमै छलफल तयार हुन चुनौती दिए । छलफल गर्न आफू तयार रहेको उनले बताए । ‘तर ठूला कुरा गर्नेहरू यो कुरा सुन्न चाहँदैनन्’ उनले भने, ‘गफ गर्नेहरू काममा कहिल्यै विश्वास गर्न सक्दैनन् ।’