सत्ता फुस्किएर विक्षिप्त बनेका ओलीले भने जस्तो नीति तथा कार्यक्रम कागजी खोस्टो मात्र हैनः नेपाल

 ८ जेठ,काठमाडौं । सत्ता साझेदार दल नेकपा एकीकृत समाजवादीका अध्यक्ष माधवकुमार नेपालले सरकारको नीति तथा कार्यक्रम सत्ता फुस्किएर विक्षिप्त बनेको एमाले अध्यक्ष केपी शर्मा ओलीले भने जस्तो कागजको खोस्टो मात्र नभएको बताएका छन् । उनले नीति तथा कार्यक्रम विगतमा एमालेले ल्याएको भन्दा उचित भएको बताएका छन् । 

सोमबार प्रतिनिधिसभा बैठकमा ओलीप्रति व्यंग्य गर्दै उनले सरकार आफ्नो हातबाट फुस्किएपछि अरूलाई सत्तो सराप गरेर केही नहुने बताए । उनले अहिले सहकार्य आवश्यक रहेको भन्दै एकले अर्कालाई घोचेर र पीडा, व्यथा पोखेर मात्र नहुने बताए । नेपालले बनिसकेको सरकार किन आफ्नो हातबाट फुस्कियो भन्ने विषयमा ओलीले अरूलाई सत्तो सराप गरेर मात्र नहुने बताए । उनले व्यक्तिवादी र सर्वज्ञानी ठान्ने रोग ओलीको अहिले सबैभन्दा ठूलो समस्या भएको बताए ।

सरकारको वार्षिक नीति तथा कार्यक्रममाथिको छलफलका क्रममा उनले दस्तावेज आफैँमा पूर्ण नहुने बताउँदै छलफल र सल्लाह–सुझावबाट सकारात्मक बनाउन सकिने भन्दै नीति तथा कार्यक्रममा समस्याको पहिचान र त्यसको समाधानका विषय पनि उल्लेख रहेको उनले बताए ।

उनले भने,‘विभिन्न विचार व्यक्त भएको छ । राम्रो विचारको अवश्यक सम्बोधन हुनेछ र प्रधानमन्त्रीले ध्यान दिनुहुनेछ । यसको कुनै अर्थ छैन भन्ने पनि आएको छ । मैले पनि मनन गरेँ, काजगको खोस्टो मात्र छ कि भनेर हेरेँ, तर मैले हेर्दा त्यस्तो पाइनँ । अर्थतन्त्रको पुनर्उत्थान, सुशासन र विकास तथा सामाजिक न्याय र राष्ट्रिय हितको विषय अघि सारिएको छ ।’ नीति तथा कार्यक्रममा गणतन्त्रलाई बलियो बनाउँदै समाजवादोन्मुख अर्थतन्त्र र समावेशीमूलक समाजको निर्माणलाई प्राथमिकता दिइएको उनले बताए ।